TIRANË– Kryeministri Edi Rama ka reaguar këtë të martë pas pranimit të planut franko-gjerman nga Kosova dhe Serbia, pas takimit që zhvilloi kryeministri Albin Kurti dhe Presidenti Aleksandër Vuçiç në Bruksel.
Në një postim në rrjetet sociale, Rama shkruan se kjo është rruga e duhur që duhej ndjekur dhe që i çon të dyja vendet drejt së ardhmes. Sipas kreut të ekzekutivit kryeministri i Kosovës Albin Kurti nuk duhet akuzuar për tradhëti pasi ka bërë gjënë e duhur duke dalë nga ‘kurthi i të djeshmes’.
POSTIMI i RAMËS:
Paqja dhe bashkëpunimi janë çelësi për të ardhmen që u detyrohemi fëmijëve tanë në këtë rajon të shkatërruar prej shekujsh nga mungesa e paqes dhe bashkëpunimit. E mirëpres pëlqimin e dy palëve për Marrëveshjen për rrugën e normalizimit ndërmjet Kosovës dhe Serbisë. Ky është një moment historik i rëndësishëm për paqen rajonale dhe unë inkurajoj fuqimisht të gjitha palët e përfshira që të vazhdojnë të punojnë për një zbatim të shpejtë. Për paqen dhe bashkëpunimin, Shqipëria është dhe do të mbetet një besimtare dhe një model roli. Ne mbështesim plotësisht çdo përpjekje për të kapërcyer të kaluarën. Uroj që askush të mos e akuzojë Albin Kurtin për tradhti apo harresë, por gjithkush të kuptojë se kryeministri i sotëm i Kosovës ka bërë gjënë e duhur, duke hedhur një hap të parë me shumë rëndësi drejt daljes nga kurthi i të djeshmes. Hapa të tjerë pasofshin pa humbur kohë.
