TIRANË– Tirana do të tronditej këtë të mërkurë nga një seri ngjarjes kriminale që deri më tani të çojnë tek i njëjti person Dan Hutra, i cili akuzohet se ka vrarë me armë zjarri motrën dhe kunatën e ish-bashkëjetueses së tij, ndërsa plagosi ish-bashkëshorten dhe nënën e saj. E gjithë dinamika e ngjarjes do të niste herët në mëngjes kur Dan Hutra do të kishte një konflikt me të dashurën e tij në Astir të cilën më pas e ka plagosor me thikë dhe e ka grabitur. Pasi ka marrë shumën e parave dhe ka lënë ashtu të therrur të dashurën autori është nisur drejt shtëpisë së ish-bashkëshortes së tij Elena Hysa ku dhe do të kryente masakrën.
Ai ka hyrë në banesë dhe pa folur fare ka qëlluar me armë zjarri kallashnikov në drejtim të katër grave që ndodheshin në banesë. Pasi ka zbrazur karikatorin në një moment arma është bllokuar. I vendosur për të mos e lënë punën përgjysmë ai nxjerr një thikë që e kishte me vete e në këtë moment nis të godasë në drejtim të ish-bashkëshortes dhe nënës së saj Kujtime Hysa. Pasi ka kryer masakrën dhe i kanë gratë të mbuluar me gjak ai ka dalë me shpejtësi dhe ka hipur në makinën e tij tip “Benz C Clas” të cilën e kishte lënë jashtë duke u nisur në drejtim të paditur.
Viktimat kanë ndërruar jetë në vend ndërsa të plagosurat janë dërguar tek Trauma ku ndodhën në gjendje kritike për jetën. Elena dhe Dan Hutra kishin kohë që ishin ndarë pasi ky i fundit e dhunonte sistematikisht. Kur ka kryer ngjarjen e rëndë Hutra kishte pak kohë që kishte dalë nga burgu pasi e kishte denoncuar ish-bashkëshortja, e cila në shenjë dobësie ka tërhequr denoncimin e bërë duke e lënë të lirë pa e ditur se liria e tij do të ishte fundi i jetës së saj. Ndërkohë e fejuara e vëllait të ish-bashkëshortes së Hutrës kishte vetëm 1 muaj që kishte hyrë nuse në derën që do bëhej dhe varri i saj.
Por autori i masakrës së Paskuqanit dyshohet që të jetë autor dhe i krimit të rëndë të regjistruar në lagjen “Beslidhja” të Kamzes ku 31-vjeçarja Etleva Kurti u ekzekutua me tre plumba në oborrin e shtëpisë. Autori është afruar dhe pasi ka ndaluar makinën, e cila ngjan me atë të Hutrës ka qëlluar tre herë në drejtim të Etlevës duke e lënë të vdekur në vend. E reja jetonte vetëm me nënën në banesë. Dyshimet se Hutra mund të jetë autori i ngjarjes i ka hedhur vëllai i Etleva Kurtit, Vladimir Kurti, i cili ndodhet në burg për vrasjen e një biznesmeni. Në fillim u dyshua se vrasja e vajzës të ketë ardhur si pasojë e hakmarrjes por Kurti shprehet se vrasësi i motrës së tij është Dan (Ramazan) Hutra pasi ai pretendon se është kërcënuar disa herë në burg ku ju ka shpëtuar dhe tentaviva për vrasje nga ana e Hutrës.
Vrasësi serial vijon të jetë ende i lirë pavarësisht se Policia e Shtetit është ngritur e gjitha në këmbë. Mësohet se të gjitha strukturat e policisë janë vënë në gatishmëri të plotë duke përfshirë dhe Forcat e Ndërhyrjes së Shpejë dhe ato RENEA që kanë zbritur në rrugët e kryeqytetit duke kërkuar për çdo gjurmë të vrasësit që përgjaku Tiranën këtë mërkurë duke marrë tre jetë të pafajshme dhe duke lënë të plagosura rëndë dy gra të tjera. Më e rëndë akoma është fakti se vrasësi është një person me precedentë të theksuar kriminal. Në vitin 2007 ai vrau me thikë bashkëjetuesen e tij Dafina Havaljan pasi dyshonte se e tradhëtonte. Për vrasjen e Havales, në mars të vitit 2009, Hutra do të dënohej me 24 vjet burg për vrasje me paramendim, por me gjykim të shkurtuar i mbetën 16 vite burg. Sipas Prokurorisë së Tiranës, Hutra dhe Havalja jetonin në një banesë me qira tek Fusha e Aviacionit./Newszone
