TIRANË- Kreu i Partisë Demokratike Sali Berisha ka mbledhur këtë të shtunë kryesinë, në lidhje me vendimin e Gjykatës së Apelit për vulën e PD-së. Berisha u shpreh se koha faktoi e nxori në pah fytyrën e shëmtuar të mafies, rast unik në histori. Ndërkohë ai shtoi se ka ndodhur që janë bërë përpjekje për të rrëzuar një qeveri, por sipas tij nuk ka dëgjuar që janë bërë përpjekje për të shkatërruar një opozitë demokratike properëndimore.
Berisha tha pë Yuri Kim se ajo nuk përfaqëson diplomacinë amerikane, që është diplomacia lider.
PJESË NGA FJALA E BERISHËS:
“Unë jam këtu për t’u bërë thirrje të gjithë demokratëve, edhe ndonjërit që ka qëndruar indiferent, të distancohet nga ky peng i shpifur, nga këta pengje të shpifur, që kanë shënuar rekordet më të ulëta të politikanit: Brava-Alibasha.
Sot është koha që demokratët të bashkohen, të gjithë ata që kanë karakter, që nuk duhet të ndjehen të keqpërdorur nga Brava-Alibasha, vegla të shpifura të Edi Ramës.
Është koha që çdo deputet të mbajë qëndrimet e tij në përputhje me interesat e qytetarëve që e kanë votuar. Të ngrihen mbi çdo interes tjetër.
Ju garantoj se ne jemi sot më të fortë se kurrë dhe nesër do jemi më të fortë se sot.
Koha faktoi se ne nxorëm në pah fytyrën e shëmtuar të mafies, rast unik në histori. Ka ndodhur që janë bërë përpjekje për të rrëzuar një qeveri, por nuk kam dëgjuar që janë bërë përpjekje për të shkatërruar një opozitë demokratike properëndimore. Dhe të kenë dështuar më radhë të gjitha përpjekjet. Përse dështuan? Sepse forca e kësaj partie janë idealet. Demokratët duhet të ndjehen krenarë, luanë. Kjo tregon se çfarë kanë arritur ata në këtë proces.
Asgjë nuk mund të mposhtë shumicën e kësaj force. Kjo shumicë, çdo ditë e më e madhe do bëhet.
Përsëri kthehem te një moment.
Nëse PD ka mbajtur qëndrimet e duhura ndaj McGonigal dhe McGonigalit me fustan, asgjë nuk mund të nxisë te ne, nuk mund të rezonojë ndjenjat tona pro-amerikane, admirimin që kemi ne për vendin e madh të lirisë, partnerit kryesor.
Edi Rama e merr si mburojë Amerikën për të fshehur korruptimin që i bëri McGonigal në aktin më të pabesë, më të turpshëm, në një akt urrejtje ndaj SHBA. Thotë se SHBA nuk mund të korruptohen. SHBA nuk korruptohen, por korruptohet McGonigali nga kryekorruptori i Shqipërisë dhe rajonit. Korruptohet guvernatorja, nuk përfaqëson ajo diplomacinë amerikane, që është diplomacia lider.
Asnjë lloj insinuate nuk mund të ketë. Ne do bëjmë gjithçka, të komunikojmë, të paraqesim të vërtetat tona në administratën e SHBA, Kongresin e SHBA. Sikundër ne do mbrojmë të drejtën, demokracinë në mënyrën më absolute në vendin tonë.”
