TIRANË– Seanca paraprake për tragjedinë e Gërdecit në Gjykatën e Posaçme Kundër Korrupsionit dhe Krimit të Organizuar (GJKKO) është shtyrë pasi ish-ministri i Mbrojtjes Fatmir Mediu nuk u paraqit para togave të zeza. Gjyqtarja, Irena Gjoka caktoi datën 23 mars për të marrë një vendim nëse do të kalojë çështjen për gjykim. Avokatët kërkojnë pushimin e çështjes. Në rast se çështja nuk pushohet, avokatët do të kërkojnë gjykim të shkurtuar.
Prokuroria e Posaçme Kundër Korrupsionit dhje Krimit të Organizuar (SPAK) kërkoi rigjykimin e Mediut, pasi e akuzon si një nga ish zyrtarët përgjegjës për tragjedinë e Gërdecit, me 26 të vrarë dhe qindra të plagosur. Gjykata e Lartë vendosi t’ia dërgojë këtë çështje për kompetencë GJKKO-së, me arsyetimin se me ndryshimet e fundit ligjore në kuadër të reformës në drejtësi, i takon asaj ta shqyrtojë dosjen penale ndaj ish-zyrtarit të lartë.
