TIRANË-Komisioni i Ankimimeve dhe Sanksioneve (KAS) ka vendosur që të rrëzojë ankimimet e depozituara nga kryetari i Partisë Demokratike Sali Berisha dhe deputeti Enkelejd Alibeaj sa i përket mosregjistrimit të PD në zgjedhje. Në mbledhjen e zhvilluar këtë të hënë është vendosur se për regjistrimin ose jo të një grupi politik në zgjedhjet e 14 majit 2023, duhet të vendosë kryekomisioneri Ilirjan Celibashi.
Enkelejd Alibeaj kundërshtoi një vendim të ndërmjetës të KQZ-së që u njohu të drejtën të përdorin logon dhe vulën, por kërkoi që një deklaratë ku shprehej vullneti për zgjedhje të lira dhe të ndershme të firmoset nga Lulzim Basha.
Ndërsa Sali Berisha ka dorëzuar ankimimin dhe ka kërkuar që KQZ të pranojë kërkesën për ta regjistruar në zgjedhjet lokale me argumentin se vendimi i Apelit që i ka hequr vulën nuk ka hyrë në fuqi dhe rrjedhimisht ai është zyrtarisht kryetar i Partisë Demokratike.
