Nga Edon Kuqi
Që prej mbrëmjes së djeshme Mimoza Paja është bërë emri më i përmendur, në çdo media, portal, tavolinë lokali apo bisedë mes miqsh. Askush nuk e dinte për ekzistencën e saj deri natën e mbrëmshme kur dora e krimit do lëshonte breshëri kallashnikovi drejt lokalit ku ajo punonte si banakiere dhe ajo do shembej në tokë për të ikur tashmë larg, në një copëz parajsë që ajo e kërkoi kaq shumë në tokë por s’e gjeti.
Mbrëmë ajo u rrëzua për të mos u ngritur më, jeta e rrëzoi dhe përplasi disa herë në tokë por ajo gjithmonë ia dilte të ngrihej por mbrëmë jo. Kur doli në mëngjes nga shtëpia për të shkuar në punë ajo nuk e dinte që nuk do të kthehej më. Nuk e dinte që errësira e natës do bënte të zezë jetën e familjarëve të saj dhe të çdo shqiptari që mbrëmë u trondit nga plumbat që i morën jetën Mozës dhe plagosen gjashtë të tjerë, mes tyre dhe e mbesa.
Mbesa e saj pas shkolle kishte shkuar tek gjyshja, e priste të mbaronte turnin e të dyja bashkë të iknin në shtëpi pa e ditur që gjyshja nuk do kthehej në strehëzën e tyre ndërsa ajo e vetë e gjymtuar nga xhamat që fluturuan në ajër pas çdo plumbi që binte mbi to.
Në lagje të gjithë e njihnin dhe e donin Mozën, nënën e gjyshën e përkushtuar që përveçse punonte me dy turne mblidhte kanaçe e shishe plastike për ti shitur, kishte 6 muaj pa paguar qiranë dhe kushedi sa halle vlonin në mendjen e saj kur plumbat i përshkruan trupin duke e larguar me shpirtin plagë e zemrën copë nga kjo botë, e cila kurrë nuk i dha atë që kërkonte.
Plumbat mbi Mozën ranë mbi trupat e secilit prej nesh! Na vranë të gjithëve ne që çdo ditë vritemi nga jeta e padrejtë e në fund qahemi sa herë që një pafajshëm tjetër vritet nga plumbat e krimit që sot është më i fuqishëm se kurrë! Sot krimi i bën karshillëk shtetit që jo në pak raste është një me ta.
Na fal Moza që asnjë nga ne nuk e dinte më parë se kush ishe dhe sa vuaje, në këtë vend me halle shumë duhet të vdesësh që të ti qajnë hallet. Mbrëmë u vramë të gjithë e sot të gjithë si vdekatarë të thjeshtë nxituam të shkonim në punë! Nesër do harrohet Moza bashkë me vuajtjet e saj derisa krimi të sulmojë sërish, të bëjë sërish kasapanë e një tjetër i vuajtuar e pa faj të shembet në tokë pa jetë, e ta gjejë parajsën atje lart se këtu vetëm ferr…
U prehtë në paqe Moza dhe realiteti i hidhur i këtij vendi!!!/Newszone
