KRUJË– 70 punonjës të Operatorit të Shpërndarjes së Energjisë Elektrike në Krujë kanë bojkotuar këtë të premte pa afat punën. Shkak për këtë është bërë arrestimi i dy kolegëve të tyre. Duke folur për mediat shefi i ekipit të OSHEE, Bardhyl Sula dhe Migen Masha shef sektorit teknik, kanë deklaruar se Policia e Shtetit po bën arrestime të padrejta. Ata shprehen se në qarkun Krujë, sa herë që zbulohen shtëpi bari apo sera kanabisi, vihen para përgjegjësisë punonjësit e OSHEE-së. Shefi i ekipit thotë se kjo ndodh për arsyen se policia nuk vë dot para drejtësisë autorët e vërtetë të krimit por arreston punonjësit e OSHEE-së. Sipas tyre OSHEE ka bashkëpunuar gjithmonë me Policinë.
Bardhyl Sula: Dje kanë arrestuar grupin e punonjës, 2 punonjës të OSHEE. Ne jemi 70 punonjës dhe ne po penalizohemi dita ditës. Arsyet janë shtëpitë e barit që i organizojnë njerëzit e krimit dhe arrestohen punonjësit e OSHEE. Ndihemi të kërcënuar. Kjo nuk është hera e parë, ne penalizohemi me argumentin që bashkëpunojmë me ta, por kjo nuk është e vërtetë. Ne vijmë në punë për të mbajtur familjen me bukë, për t’u ushqyer, ne çdo ditë jemi të kërcënuar kur vijmë në punë. Ne kërcënohemi kot, familjarët janë të indinjuar.
Migen Masha: “OSHEE ka qenë gjithnjë me policinë e shtetit. Nuk sulmon dhe nuk zbulon autorët e vërtetë të shtëpive të barit. Përveç abonentëve që kanë nevojë, të sëmurë, që kanë fatkeqësi ne nuk do bashkëpunojmë më me policinë dhe nuk do ofrojmë më ndihmë.
Dy punonjësit u arrestuan në kuadër të operacionit “Tiuneli” që çoi në zbulimin e një tuneli të mbushur me drogë. Policia i akuzon ata se kanë pasur dijeni për këtë veprimtari të paligjshme dhe e kanë përkrahur.
