Fenomeni i vjedhjeve në zonën e Lushnjës po kthehet në një makth për banorët. Pas zonës së Darsisë ku disa javë më parë u vodhën disa banesa, këtë herë hajdutët u futën në aksion në Biçakaj, Allkaj e Qerret. Banorët tregojnë se hajdutët u janë futur deri në dhomat e gjumit.
“Kanë marrë makinë, portofolin, ca lekë”.
“Nëse atë natë policia do kishte bërë patrullim në rrugë, do i kishte kapur, kemi frikë të rrimë në shtëpinë tonë”- shprehen banorët e frikësuar.
Rastet janë të shumta, nga vjedhja e makinave apo e lekëve, por ajo që i tremb banorët është lënia e lirë e autorëve. Deri tani policia nuk ka arritur të identifikojë asnjë nga hajdutët e shtëpive, çka i ka bërë banorët të kenë frikë natën. Vitet e fundit rastet e vjedhjes së shtëpive natën kanë qenë të shumta në Lushnjë./Top Channel
