VLORË– Është vënë në pranga 27-vjeçari Rilidi Kocja që plagosi me thikë vjehrrin e kunatin e tij. Në njoftimin e Policisë së Vlorës bëhet me dije se Kocja është kapur pas dy një ore kërkimi nga efektivët e qytetit. Kocja u zu me vjehrrin e tij, Xhevdet Brahushi, 62 vjeç dhe kunatin, Albion Brahushi 30 vjeç. Të dy janë gjetur të plagosur me thikë në një nga rrugët e lagjes “Çole”. Ata janë dërguar në spital ku ndodhen në gjendje të rëndë për jetën.
NJOFTIMI I POLICISË:
Plagosi me mjet prerës (thikë), vjehrrin dhe kunatin e tij dhe u largua nga vendngjarja, kapet dhe vihet në pranga pas një orë kërkimesh e ndjekjeje nga shërbimet e Policisë. Shërbimet e Komisariatit të Policisë Vlorë, pas marrjes së njoftimit se gjatë një konflikti të çastit për motive të dobëta, në lagjen “1 Maji”, Vlorë, ishin plagosur me mjet prerës (thikë) dy shtetas, menjëherë shkuan në vendngjarje. Si rezultat i reagimit në kohë dhe i veprimeve të shpejta hetimore dhe profesionale të kryera në vendngjarje është bërë i mundur identifikimi i autorit të dyshuar. Shërbimet e Policisë pas afro një orë kërkimesh kanë lokalizuar, kapur dhe prangosur, në lagjen “8 Nëntori”, autorin e dyshuar shtetasin R. K., 27 vjeç, banues në Tiranë. Ky shtetas pas një konflikti të çasit për motive të dobëta, ka plagosur me mjet prerës (thikë), vjehrrin dhe kunatin e tij, shtetasit Xh. B., 61 vjeç dhe A. B., 30 vjeç, të cilët ndodhet në spital, nën kujdesin e mjekëve. Në vendngjarje në cilësinë e provës materiale, shërbimet e Policisë gjetën dhe sekuestruan 2 mjete prerëse thika. Vijon puna për dokumentimin e plotë të kësaj ngjarjeje.
