TIRANË– Po zhvillohet me diskutime të shumta seanca e sotme plenare. Kështu deputetët e opozitës kishin kërkuar një interopelancë me ministren e Arsimit Evis Kushi. Gjatë fjalës së saj deputetja e Partisë së Lirisë Erisa Xhixho deklaroi se studentët janë të përjashtuar nga paketa e rizistencës të sjellë nga qeveria. Sipas saj studentët sot përballen me çmime të larta dhe koston e jetesës. Ndërkohë në përgjigje ministrja Kushi deklaroi se ka një mbështetje për studentët dhe ajo është karta e studentit ku radhiti dhe përfitimet e saj. Sipas Kushit së fundmi është vendim i Këshillit të Ministrave për kredinë e studentëve.
Erisa Xhixho: Por le të kthehemi të studentët që janë përjashtuar nga paketat e rezistencës të sjellë nga qeveria. Ato janë përjashtuar dhe nga pakoja e madhe. Studentët përballen me rritjen e çmimeve dhe koston e jetesës. Një studenti i duhet 500 euro në muaj. Karta e studentit nuk arriti të behet kurrë realitet, por është thjesht një tallje .Studentët janë lënë jetim nga kjo qeveri e në mungesë të shpresës marrin gomonen. Kjo qeveri vazhdon të tallet me studentët duke zvarritur dhe pagesën e bursave.
Evis Kushi: Ka mbështetje që është për studentët. Karta e studentit nuk është një mashtrim, përkundrazi është një mbështetje për ta. Së fundmi kemi nënshkruar dhe marrëveshje me bashkinë e Durrësit. Përsa i takon konvikteve, ka vendosur përgjysmimin e tarifave për të gjithë studentët që akomodohen në konvikte. Po ashtu dhe transport falas. Kemi draftuar një vendim të Këshillit të ministrave për kredinë e studentëve. Për herë të parë studentët kanë të drejtë të marrin një kredi.
