TIRANË– Prokuroria e Posaçme Kundër Korrupsionit dhe Krimit të Organiuzar (SPAK) ka sekuestruar këtë të premte një tjetër vile tashmë në pronësi të partneres aktuale të ish-ministrit Arben Ahmetaj. Vila buzë detit të Hamallajt ndodhet në rezidencën “Vala Mar” dhe është në pronësi të Erjola Hoxhës. Ndërkohë më herët SPAK sekuestroi vilën në Palasë të ish-bashkëshortes së ish-ministrit Arben Ahmetajt, Albina Mançka. Vila numër 73 në kompleksin ‘Green Coast’ do të qëndrojë në sekuestro preventive, ndërsa më herët ish-gruaja e Arben Ahmetaj, ka deklaruar se nuk është pronë e saj.
Dera e vilës u hap me forcë nga agjentët e SPAK të mbështetur dhe nga policia e Vlorës pasi ishte e mbyllur. Atyre u erdhën në ndihmë zjarrfikësit. Raportohet se brenda saj janë gjetur një sërë dokumentesh që kanë të bëjnë me kontratat mbi pronësinë por ende nuk ka detaje nga SPAK në lidhje me sekuestron.
Ish-ministri i Ekonomisë dhe Financave Arben Ahmetaj është vënë zyrtarisht nën akuzë nga SPAK për katër vepra penale. Ai akuzohet për: “Korrupsion”, “shpërdorim detyre”, “fshehje e pasurisë” dhe “pastrim parash”.
