PEJË– Një zjarr masiv ka përfshirë një depo, e cila ndodhet afër qendrës tregtare ‘ELKOS’ në Pejë. Raportohet se në fillim janë përfshirë nga flakët e zjarrit depot, më pas edhe qendra tregtare ELKOS Center në Pejë. Zëdhënësi i policisë për Pejën, Fadil Gashi, ka bërë të ditur se policia dhe zjarrfikësit ndodhen në vendin e ngjarjes.
Deri më tani si pasojë e flakëve raportohet për tetë përsona të plagosur të cilët janë dërguar në spital dhe ndodhen nën kujdesin e mjekëve dhe jashtë rrezikut për jetën. Emergjenca e Spitalit të Përgjithshëm në Pejë ka konfirmuar se personat e dërguar në spital si pasojë e problemeve me frymëmarrjen për shkak të zjarrit, po trajtohen dhe gjëndja e tyre është jashtë rrezikut për jetën.
“Në Spitalin e Përgjithshëm në Pejë deri më tani janë duke u trajtuar 8 pacientë nga rasti i djegies së një objekti në Pejë. Pacientët janë duke u trajtuar tek Spitali ynë dhe gjendja e tyre është stabile dhe jashtë rrezikut për jetë dhe janë raste kryesisht të helmuar nga tymi”, -thuhet në njoftim.
