TIRANË– Autoriteti i Mediave Audiovizive dhe shoqatat e gazetarëve kanë reaguar këtë të hënë ndaj sulmit me kallashnikov në zyrat e Top Channel ku për pasoijë u vra roja i siugurisë Pal Kola. Ata kërkojnë zbardhjen e plotë të ngjarjes dhe vënien para drejtësisë të autorëve.
REAGIMET:
Qendra Evropiane për Lirinë e Shtypit dhe të Medias: Mbetëm të shokuar kur mësuam se ka pasur një sulm me armë zjarri në ambientet e Top Channel në #Shqipëri, ku humbi jetën një roje sigurie e objektit. I shprehim ngushëllimet tona familjes dhe i bëjmë thirrje autoriteteve shqiptare të kryejnë hetime të pavarura dhe profesionale.
Safe Journalist Albania: Mendimet tona janë me familjen e rojës së sigurisë që humbi jetën në sulmin tragjik ndaj ambienteve të Top Channel në Shqipëri. I bëjmë thirrje qeverisë shqiptare të kryejë hetime të plota dhe të paanshme për këtë incident dhe të nxjerrë autorët para drejtësisë.
Shoqata “Gazetarët Profesionistë të Shqipërisë”: Dënojmë me forcë sulmin terrorist me armë në orët e para të mëngjesit të sotëm ndaj televizionit kombëtar Top Channel, gjatë të cilit humbi jetën roja i sigurisë. Shoqata e Gazetarëve Profesionistë të Shqipërisë dhe Lidhja e Gazetarëve të Shqipërisë shprehin solidaritetin e plotë me kolegët e gjithë komunitetin e Top Channel dhe i përcjellin ngushëllimet më të ndjera familjarëve të të ndjerit Pal Kola. Shoqata u bën thirrje agjencive ligjzbatuese për hetime të sa më të shpejta dhe transparente mbi këtë ngjarje tronditëse për gjithë komunitetin e gazetarëve.
Autoriteti i Mediave Audiovizive: Njoftim për median. Ngjarja e mesnatës së kaluar, kur godina e televizionit Top Channel ishte objekt një sulmi me armë zjarri, me pasojë humbjen e jetës së një punonjësi të sigurisë, po përcillet me shumë shqetësim nga Autoriteti i Mediave Audiovizive. Goditja e një mjedisi mediatik është një goditje ndaj demokracisë, ndaj lirisë së fjalës dhe mendimit. AMA shpreh ngushëllimet për familjen e punonjësit që humbi jetën nga ky agresion i papranueshëm dhe qëndron në krah të të gjithë ekipit të televizionit në këto momente të vështira. AMA kërkon nga institucionet ligjzbatuese që të përparojnë me shpejtësi për ndriçimin sa më pare të rrethanave dhe autorët të vihen para përgjegjësisë ligjore.
Ngjarja e rëndë është regjistruar rreth orës 01:00. Persona ende të identifikuar janë afruar me një makinë tip “Range Rover” dhe kanë hapur zjarr ndaj zyrave të Top Channel. Si pasojë e të shtënave ka mbetur i vrarë roja i sigurisë, 60-vjeçari Pal Kola. Pas breshërisë së kallashnikovit të zbrasur në Top Channel autorët janë larguar e më pas kanë djegur mjetin e përdorur në sulm, i cili rezulton të jetë i vjedhur.
