SHKODËR– Dy persona kanë rënë në prangat e policisë së Shkodrës këtë të hënë pasi shpërndanin lëndë narkotike. Brijan Vlladna dhe Briken Dibra u arrestuan në lagjen “Qemal Stafa”. Dy të rinjtë 22 dhe 20 vjeç në bashkëpunim me njëri-tjetrin, shpërndanin doza të lëndës narkotike kanabis, në qytetin e Shkodrës. Në momentin e arrestimit iu gjetën dhe sekuestruan sasi lënde të dyshuara narkotike cannabis sativa.
NJOFTIMI I POLICISË:
Finalizohet operacioni policor i koduar “Dërgesa”. Vihen në pranga 2 shtetas që shpërndanin lëndë narkotike në doza, në qytetin e Shkodrës. Sekuestrohet një sasi lënde e dyshuar narkotike kanabis. Specialistët e Seksionit për Hetimin e Narkotikëve, në vijim të kontrolleve për kapjen e personave që ushtrojnë veprimtarinë kriminale të shpërndarjes së lëndëve narkotike, bazuar dhe në informacionet e siguruara përmes inteligjencës informative, për një rast të kësaj veprimtarie kriminale, në bashkëpunim me shërbimet e Komisariatit të Policisë Shkodër, kanë organizuar dhe finalizuar operacionin policor të koduar “Dërgesa”.
Në kuadër të këtij operacioni, u arrestuan në flagrancë shtetasit: B.V., 22 vjeç dhe B. D., 20 vjeç, të dy banues në Shkodër. Gjatë operacionit, shërbimet e Patrullës së Përgjithshme kanë ndaluar për kontroll, në lagjen “Qemal Stafa”, këta 2 shtetas, të cilëve iu kanë gjetur sasi lënde të dyshuara narkotike cannabis sativa.
Në vijim të operacionit, gjatë kontrollit të ushtruar në banesën e shtetasit B. V., shërbimet e Policisë gjetën një tjetër sasi lënde të dyshuar narkotike cannabis sativa, e cila u sekuestrua në cilësinë e provës materiale.
Nga veprimet hetimore dyshohet se këta shtetas, në bashkëpunim me njëri-tjetrin, shpërndanin doza të lëndës narkotike kanabis, në qytetin e Shkodrës. Vijojnë veprimet hetimore për dokumentimin e plotë të veprimtarive kriminale të këtyre shtetasve, identifikimin dhe kapjen e shtetasve të tjerë të përfshirë. Materialet iu referuan Prokurorisë pranë Gjykatës së Rrethit Gjyqësor Shkodër, për veprime të metejshme.
