Presidenti Zelenski ka ndërmarrë një iniciativë kurajoze për të vizituar trupat e tij në lindje të Ukrainës.
Kreu i shtetit në fjalimin e tij të mesnatës, tha se kishte vizituar trupat ukrainase në vijën e parë të luftës në rajonet Llugansk dhe Donjeck, aty ku ofensiva ruse është intensifikuar prej javësh.
Lideri ukrainas njoftoi se kishte qenë në qytetet Llisihansk dhe Solledar në këto dy rajone në Donbas.
“Unë vizitova trupat tanë në disa nga pozicionet më të bombarduara të vijës së parë. Jam krenar për të gjithë ata me të cilët shtrëngova duart e komunikova. U çova atyre diçka, por nuk dua të jap më shumë detaje, por gjithashtu edhe mora diçka shumë të rëndësishme nga ata, besimin dhe forcën,” tha presidenti ukrainas.
Të dy rajonet të cilat formojnë Donbasin, një nga zonat më të industrializuara të Evropës kanë qenë nën sulme të rënda prej javësh nga ana e forcave të Moskës, duke vuajtur nga bombardimet dhe sulmet ajrore.
Më herët, Zelenski tha se kishte takuar qytetarët e kryebashkiakët nga qytetet e pushtuara Mariopul dhe Zaporizhia në një rajon të kontrolluar nga Kievi, raporton The Guardian.
“Shkova në Mariopul dhe u takova me banorët që arritën të largoheshin nga qyteti shëndoshë e mirë bashkë fëmijët e tyre. Kushtet e tyre aktuale janë të përkohshme, por jo të këqija. Çdo familje kishte historinë e saj, shumica pa burra. Dikujt burri i shkoi në luftë, dikujt i është kapur rob e dikujt tjetër për fatin e keq i ka vdekur në luftë,” tha ai.
