TIRANË– Kryeministri Edi Rama ka deklaruar këtë të martë se qeveria do të shpërndajë 5 mijë lek të reja për çdo pensionist në muajin prill. Pas mbledhjes së qeverisë tha se kjo nuk ka të bëjë me zgjedhjet vendore dhe se nuk është në shkelje të Kodit Zgjedhor.
Pyetje: A do të ketë një rritje tjetër pas datës 1 prill pasi të aplikohet paga minimale 40 mijë lekë? A jeni në shkelje të Kodit Zgjedhor pasi nuk lejohet që qeveria 4 mauaj para zgjedhjeve të ulë taksa e të japë shpërblime?
Edi Rama: Këto janë çështje e vendime den baba den dhe nuk kanë lidhje me zgjedhjet. Për pensionistët që janë mbi të gjithë dhe që për 1 mijë e 1 arsye kanë dhënë më shumë se të gjithë dhe kanë marrë më pak se të gjithë e nuk duhet t’i shkojë mendja askujt ta bëjë këtë pyetje. Ky është një adresim në vazhdim i një problemi që ekziston siç ekzistonte më parë, por nuk ndjehet sepse qeveria shqiptare është aty në mbrojtje të të gjithë familjarëve e konsumarit, siç ndodhi për energjinë elektrike. Janë disa zgjedhje vendore dhe nuk mund tu themi që prisni katër muaj ju sepse ashtu kanë vendosur partitë me kinezeritë e tyre. Por nuk mund t’i shkojë në mendje askujt që të na pengojë ne të dëmshpërblejmë pensionistët në kushtet që jo 5 mijë lekë, por edhe 1 mijë lekë janë shumë. Do ta bëjmë tani dhe vitin e ardhshëm do të hedhim një hap tjetër për të bërë një rritje pagash historike.
