TIRANË– Kryekomisioneri i Zgjedhjeve Ilirjan Celibashi ka deklaruar këtë të enjte se premtimi i bërë nga kryeministri Edi Rama ditën e djeshme se do të japë 5 mijë lekë të rinj për pensionistët në muajin prill nuk shtë në shkelje të Kodit Zgjedhor, i cili parashtron se ndalohet deri në 4 muaj para zgjedhjeve dhënia e shpërblimeve. Celibashi tha se Kodi Zgjedhor e parashikon diçka të tillë për zgjedhjet parlamentare dhe jo ato lokale.
Pyetje: A mund të më sqaroni specifikisht aktivitetet e ndaluara 4 muaj para zgjedhjeve, a përfshijnë shpërblimin e pensionistëve, qeveria ka premtuar dhe rritjen e pagave, a janë këto aktivitete të ndaluara?
Ilirjan Celibashi: Shiko, kjo çështja e vlerësimit të veprimtarisë së institucioneve publike është bërë disa objekt diskutimi. Ajo që dua të sqaroj është fakti që vlerësimet i japim rast pas rasti, për aktivitete dhe për aktete e vendimmarrjeve të caktuara. Kjo nuk është aspak qasje refuzuese apo që të konsiderohet si mospërgjigje ndaj pyetjes tuaj, por në momentin që do të ketë një akt të tillë nga kryeministrit apo qveerisë, do t’ju informojmë. Ne ende nuk kemi aktin apo veprimtarinë, ndaj nuk japim dot vlerësime apo gjykime. Nuk do të ishim në rolin tonë si KQZ nëse do ta bënim këtë gjë, por do të dilnim si analistë. Nuk shoh asnjë arsye për të mos iu përgjigjur por ka një dallim mes akteve dhe veprimtarive. Përsa u përket akteve dhe veprimtarive që prodhojnë veprimtaritë publike, kodi ka rregullimin e plotë në lidhje me përcaktimin se cila është veprimtari e një funksionari publik dhe cila është politike. Në vlerësimin tonë kjo është e qartë dhe kjo gjë lidhet me kodin e afatin para zgjedhjeve, 4 muaj para, përsa u përket veprimtarive. Përsa u përket akteve, është e ndryshme për akte të ndryshme. Duhen vlerësuar disa rrethana për ta vlerësuar këtë gjë. Ka akte të cilat të qeverisë apo institucioneve publike që fillon dhe përfundon brenda periudhës 4-mujore. Parë kështu, duket sikur po thyejmë Kodin Zjgedhor. Por nëse e vlerësojmë më tej, do të thotë që është në përputhje me parashikimet e Kodit Zgjedhor. Në këtë rast nuk kemi vendimmarrje, por kemi deklarim. Nuk vlerësojmë deklarime. Një gjë dua ta theksoj, Kodi Zgjedhor ka ndalime që lidhen vetëm me zgjedhjet e përgjithshme.
