POGRADEC– Policia e Pogradecit është vënë në alarm të kuq në orët e parë të mëngjesit të kësaj të diele. Raportohet se një telefonatë ka mbërritur në polici ku roja i një objekti kishte deklaruar se ka parë një person të dyshimtë që kishte futur diçka poshtë makinës në pronësi të Eris Çekanit. Roja u shpreh se personi ende i paidentifikuasr është shtrirë në tokë dhe ka vendosur diçka dh më pas është larguar.
Kjo ka bërë që blutë e Pogradecit të lajmëronin forcat xheniere nga Tirana pasi fillimisht u dyshua për lëndë eksplozive. Pas mbërritjes së ekipit dhe procedurave të kryera u konstatua që nuk kemi të bëmë me lëndë plasëse por me një GPS.
Ponari i mjetit Eris Çekani rezulton të ketë qënë i përfshirë në një ngjarje të ndodhur Elbasan mes disa personave të cilët udhëtonin me dy makina. Ata ndoqën njëri-tjetrin si nëpër filma deri në aksin rrugor “Elbasan-Metalurgjik” dhe më pas përplasën njëri tjetrin. Mesa duket ngjarja nuk ka mbetur me kaq. Personat me vendosjen e GPS mund të kenë tentuar që të kenë informacion për lëvizjet e Çekanit dhe organizimin e ndonjë atentati të mundshëm.
