POGRADEC– Sidni Syzo, 28 vjeç është shpallur në kërkim nga policia e Pogradecit si autor i vendosjes së GPS-ve në makinën e Eris Çekanit dy ditë më pare në Pogradec. Ai akuzohet për ndërhyrje të padrejta në jetën private. Dyshohet se shkak për këtë të jenë bërë konfliktet që autori dhe Cekani kanë me njëri-tjetrin pas disa përplasjeve. Nuk përjashtohet mundësia e ndonjë atentanti të mundshmë ndaj Eris Cekanit.
NJOFTIMI I POLICISË:
Në vijim të informacionit paraprak të dhënë ditën e djeshme, për vendosjen e 2 pajisjeve GPS, në automjetet e shtetasit E. Ç., që jepeshin me qira prej tij, ju bëjmë me dije se:
Specialistët për Hetimin e Krimeve të Komisariatit të Policisë Pogradec kanë vijuar hetimet, në bashkëpunim me Prokurorinë e Pogradecit, me qëllim zbardhjen dhe dokumentimin e plotë ligjor të këtij rasti. Në përfundim të veprimeve të para hetimore, u referuan materialet në Prokurori dhe u shpall në kërkim autori i dyshuar i këtij rasti, shtetasi S. S., 28 vjeç, banues në Pogradec, për veprën penale “Ndërhyrje të padrejta në jetën private”. Materialet procedurale i kaluan Prokurorisë, për veprime të mëtejshme.
