ELBASAN- Kandidati i koalicionit “Bashkë Fitojmë”, Luçiano Boçi ka mbledhur në një tryezë diskutimi ekspertët e turizmit në Elbasan, për të kërkuar mendimin e tyre mbi projektet e propozuara prej ekipit të tij. Gjatë fjalës së tij Boçi përmendi nevojën urgjente për ringjalljen e Kalasë dhe rikthimin e gërmimeve antike në atraksion absolut të qytetit, krijimin e një Shtëpie ndërkombëtare të përkthimit në gjurmët e traditës së Elbasanit.
Po ashtu sipas Boçit duhet të ndërtohen menjëherë tureve të turizmit fetar. Ndërsa sqaroi se mbi 70 persona kanë punuar mbi platformën e tij zgjedhore dhe projekti më i mirë për Elbasanin e së ardhmes, Boçi tha se mbështetja për turizmin si dhe hapja e bashkisë për nevojat e qytetarëve do të jenë synimet e tij kryesore.
“Ka vetëm një cilësor që përdoret për Elbasanin: Ai është i bukur! Sikur ne të përthithim në Elbasan një të pestën e gati 8 milion vizitorëve që hyjnë në Shqipëri në vit – objektiv I mundshëm, do të kishim jo më pak se 55 miljon euro të ardhura për qytetarët. Synimi ynë në fakt është të arrijmë 4 herë më shumë brenda fundit të mandatit tim”, tha Boçi.
Po ashtu Boçi përmendi dhe ngritjen e ‘Qytetit të Filmit’. Qyteti i Filmit në Elbasan mund të mbështetet nga një Park i madh dhe acquapark si ai në Cinecittà të Romës.
“Qershia mbi tortë, është që në këtë qytet ku socialistët nuk kanë lënë në këmbë as një kinema, ne do të ngremë Qytetin e Filmit. Rrallë një vend në botë ka kaq pranë e pranë Kalanë romake të banuar, qytetin e ndërlidhur natyrshëm me të, reliket e një industrie të rrëzuar dhe shpatullat e përflakta të metalurgjisë, lumin, liqenet, kodrat e buta, fushat dhe malin… të gjitha në pak km largësi. 80 monumente kulture përfshi rrënoja antike, gjurmë të via Egnatia, ura të lashta dhe pafundësisht histori jetojnë këtu në shtëpinë e tyre. Elbasani është një shesh natyror xhirimi për çdo film të mirë!” tha Boçi.
