TIRANË– Nga studio e emisionit ‘Stay Tuned’ në MCN, Julian Hodaj ka komentuar lidhur me listat e këshillit bashkiak në Partinë Socialiste për të cilën u shpreh se ajo paraqet një gërshetim idesh dhe prurjesh të reja, duke u ndalur veçanërisht tek të rinjtë. Ndërsa referuar listës së opozitës ai tha se sheh një konglomerat individësh dhe papajtueshmëri të theksuara ideologjike.
Nëse shihni listën e PS do shihni se ka një gërshetim moshash, eksperiencash, ka një gërshetim idesh dhe prurjesh së reja, pra kemi jurist, ekonomistë, përfaqësues të biznesit dhe ka një përputhshmëri të mirë në atë që janë interesat e qytetarëve, si dhe të rinjtë që janë një energji shtesë. U kemi dhënë përparësi shumë të rinjve të talentuar që shpresoj të bëhen pjesë të këshillit bashkiak dhe të japin kontributin e tyre. Kjo përbërje e këshillit bashkiak të Tiranës, kemi mundësi ta shohim qytetin nga ata që kanë më shumë eksperiencë, si është dhe nga të rinjtë si e duan. Nga kampi tjetër shoh një konglomerat individësh me eksperienca të ndryshme dhe shoh që brenda atij grupi ka papajtueshmëri të theksuara ideologjike. Nuk ka se si një grup që vjen nga e majta të jetë dakord me atë që ka ide nga e djathta, them se kjo do i dëmtojë shumë. Duket sikur nuk ka një ide të qartë se si duhet të jetë Tirana e së ardhshmesh.
I pyetur lidhur me dy kandidatët përballë Veliajt, Roland Bejko dhe nga ana tjetër Belind Këlliçi, se si i sheh, Hodaj tha se e kaq të vështirë të merret me kundërshtarin, por nisur nga disa premtime të dëgjuara nga ata i janë dukur absurde.
“Ta nisim nga ai që pretendon se do marrë më shumë vota, që është Këlliçi, unë e kam pak vështirë të merrem direkt me kundërshtarin por do merrem pak me ide. Kam ndjekur sondazhe dhe numra dhe kam parë që se njeh njeri. Kam dëgjuar dy tre gjëra që më janë dukur absurde, çka do të thotë ose se ka idenë fare se ku është Tirana sot dhe se ka idenë fare se ku do të shkojë Tirana nesër. E para ishte nuk na duhen korsitë e biçikletave në Tiranë, kjo për mua është absurditet, po s’ka sens që në 2023 të dalë dikush që pretendon të kandidojë për kryetar bashkie dhe do të heqë korsinë e biçikletave. Tirana në 8 vite ka shtuar diku te 60 km korsi biçikletash dhe po të shihni kemi një sasi të madhe njerëzish që lëvizin me biçikleta dhe patina elektrike. Nëse e fiton Këlliçi, qytetarët mund të udhëtojnë falas vetëm me tramin e bërë nga Basha, jo me transportin publik. Kjo është të flasësh dhe të premtosh me duar në xhepa. Më thoni ju kush kryetar bashkie nuk do donte ta kishte transportin publik falas, por pse nuk është realitet, sepse nuk është e realizueshme ekonomikisht”.
Nga ana tjetër Hodaj theksoi se është shtuar numri i linjave të urbanëve, numri i pritjes në stacion është ulur dhe se këto kanë kosto. Sipas tij, po të shohësh sot gjendjen në krahasim me çfarë ishte vihet re një përmirësim i dukshëm i gjithë parametrave të transportit publik.
“Duhet bërë akoma më tepër jemi dakord, ne mendojmë se e ardhmja janë autobusët hibrid dhe elektrik, si mund ta bëjmë këtë me linjat e reja, kjo do i joshi qytetarët dhe më shumë të përdorin transportin publik. Bashkia do bëjë dhe një provë të vetën që një pjesë të transportit publik, ti menaxhojë me një kompani publike në mënyrë që të fusim njëlloj rregullatori në treg”.
Ai ka folur lidhur me zgjedhjet e 14 majit ku u shpesh se Partia Socialiste nuk flet me duar në xhepa siç bëjnë kundërshtarët e tyre. Ai tha se kanë një program dhe se dinë ku ishin dhe ku duam të shkojnë. Sipas tij pavarësisht situatës ku ndodhet opozita, zgjedhjet nuk janë asnjëherë të lehta, ndërsa shprehet i bindur për fitoren e Veliajt në Tiranë.
“Është shumë e rëndësishme të dish të tria fazat. Ku ishim në 2015 kemi vetëdije të qartë, shifra të qarta se ku kemi arritur në këto 8 vite dhe kemi një ide të qartë se ku duam të shkojmë në katër vitet e ardhshme. Zgjedhjet nuk janë asnjëherë të lehta. Ajo që ndodhi në 2019 ishte fatkeqësisht një dëshirë e tyre, në një pikë të caktuar vendosën të besonin në çmenduri kolektive. Por thash zgjedhjet nuk janë asnjëherë të lehta dhe presupozohet se kundërshtari do ketë alternativa, por nuk mendoj se do jenë të vështira, të paktën në Tiranë ne nuk rrezikojmë rezultatin sepse ka një diferencë të ndjeshme mes dy skuadrave. PS është si skuadra e madhe që bën lojën e vetë pa konsideruar kundërshtarin, edhe pse e respektojmë kundërshtarin, por e dimë forcën e tij, por mbi të gjitha dimë forcën tonë. Në 2019 zgjedhjet ishin shumë atipike, ndërsa aktualisht në terma votash do mundohemi të forcojmë veten”.
Në vijim ai theksoi se duke e parë Këlliçin nga plani politik, për PS do thoshim që bën shumë mirë që bën fushatën siç e bën.
“Dikush që premton gjëra absurde dhe me duar në xhepa dhe po të shohësh listën që do mbështesë nuk më duket se ka dhe shumë të rinj që e mbështesin. Tjetra që është akoma dhe më e rëndë, ai ka qenë dhe punonjës në bashki të Tiranës dhe dikush që e di se si funksionon ai institucion nuk mundtë pretendoj të premtoj gjëra të pabëshme”.
