TIRANË– Agjencia e Sigurimit të Depozitave pritet të rinovojë linjën e kreditit të gatishmërisë me Bankën Europiane për Rindërtim dhe Zhvillim (BERZH). Në mbledhjen e zhvilluar në fund të muajit mars, Këshilli Drejtues i ASD miratoi dhënien e autorizimit paraprak Drejtorit të Përgjithshëm, për fillimin e negociatave dhe hartimin e projektmarrëveshjes së linjës së kredisë.
Këto linja kredie po përdoren nga ASD që prej vitit 2014, me qëllim sigurimin e një rezerve të mëtejshme, në rast se paraqitet nevoja për të kompensuar depozituesit e siguruar Linja aktuale e kreditit ka një shumë limit prej 100 milionë eurosh, me afat deri në 11 qershor 2023.
Agjencia e Sigurimit të Depozitave shprehet se, “në bashkëpunim dhe koordinim të vazhdueshëm me autoritetet rregullatore dhe mbikëqyrëse të sistemit financiar në Shqipëri, vlerëson se tensionet gjeopolitike, rritja e inflacionit, sulmet kibernetike, etj, e gjetën sistemin bankar shqiptar likuid dhe të mirëkapitalizuar. Gjithsesi, me qëllim garantimin e mekanizmave mbrojtës për çdo situatë, Agjencia çmon si të nevojshme sigurimin e një linje kredie në gatishmëri (stand-by), e cila do të jetë një instrument që do të shërbejë për të rritur kapacitetin e Agjencisë së Sigurimit të Depozitave në përmbushjen e detyrimit të saj ligjor, mbrojtjen dhe garantimin e depozitave të siguruara.”
Skemat e sigurimit të depozitave, që administrohen nga ASD, sigurojnë depozitat bankare deri në një vlerë maksimale prej 2.5 milionë lekësh dhe ato në shoqëritë e Kursim-Kreditit, deri në një shumë maksimale prej 2 milionë lekësh.
Vlera kontabël e fondit të sigurimit të depozitave në banka në fund të vitit 2021 arriti në rreth 52.8 miliardë lekë, lekë me një rrije prej 10.2% krahasuar me një vit më parë. Skema e sigurimit të depozitave në banka paraqitet tashmë e konsoliduar dhe ka kaluar prej vitesh kufirin e 5% të depozitave të siguruara, nivel që pranohet përgjithësisht si minimum i nevojshëm për tu arritur nga skemat e sigurimit të depozitave.
Ky tregues llogaritet si raporti mes vlerës totale të fondit të sigurimit të depozitave bankare dhe vlerës totale të depozitave të siguruara. Raporti i mbulimit të depozitave të siguruara bankare nga fondi përkatës që administrohet nga ASD, në fund të vitit 2021, arriti në 6.66%, nga 6.46% që pati qenë një vit më parë. Nëse marrim në konsideratë dhe linjën e kredisë prej 100 milionë euro që ASD mban me BERZH, ky raport arrin në pothuajse 8.2%.
Sipas ligjit “Për Sigurimin e Depozitave”, për bankat tregtare, primi tremujor i sigurimit përllogaritet si 0.125% e mesatares aritmetike të shumës së depozitave të siguruara, që janë regjistruar në bankë në ditën e fundit të çdo muaji të tremujorit të mëparshëm. Megjithatë, ligji “Për Sigurimin e Depozitave”, në nenin 35, pika 11 përcakton se “Agjencia (ASD) mund të ulë primin tremujor të pagueshëm nga bankat anëtare të skemës së sigurimit të depozitave deri në 0,025% të mesatares aritmetike të shumës së depozitave të siguruara, që janë të regjistruara në bankë në ditën e fundit të çdo muaji të tremujorit të mëparshëm, por vetëm nëse mjetet financiare të Agjencisë janë jo më pak se 5% të mesatares së këtyre depozitave”.
Duke qenë se ky nivel është arritur prej vitesh, bankat tregtare po kërkojnë me këmbëngulje uljen e primit të sigurimit. Nga ana e saj, ASD është shprehur se është në fazën e kryerjes së analizave për të zhvilluar më tej skemën e sigurimit të depozitave në banka, por çdo vendim për të ndryshuar parametra të ndryshëm të skemës duhet të merret në dakordësi dhe koordinim me institucionet e tjera të përfshira, duke filluar nga Banka e Shqipërisë dhe Ministria e Financave./Monitor
