TIRANË– Seanca e kësaj të enjte është shoqëruar me debate të shumta. Kështu gjatë fjalës së tij deputeti socialist Pandeli Majko është shprehur se seanca nuk duhet të kthehet në një beteje elektorale. Po ashtu Majko ironizoi opozitën duke cituar deklaratat e bëra më herët nga deputeti demokrat Enkelejd Alibeaj se opozita është pastruar nga servilët dhe se kanë kaluar në anën e PS.
Kjo gjë mesa duket ka irrituar deputeten e Partisë Demokratike Jorida Tabaku, e cila theksoi se është turp që përmenden emra kolegësh në sallë. Tabaku nuk nguroi ti përmende Majkos dhe moshën, që sipas saj nuk duhet t’ia lejojë batuta të tilla.
Pandeli Majko: Ritheksoj se kërkesa e një grupi deputetësh për të rishikuar disa shqetësime të grupeve të interesit, kjo më duket shumë e bazuar dhe nuk mendoj se sot në parlament duhet të bëhet një fushatë e çuditshme elektorale. Përse thoni që ne po ndryshojmë programin dhe rendin e ditës ftoj zotin Leskaj të reagojë. Sot përfaqësuesi i partisë komuniste përfaqësohet nga partia juaj, citoj kryetarin tuaj që ka thënë se sot PD është pastruar nga servilët dhe i ka marrë PS, pra zonjën Jorida dhe Bardhin i kemi marrë ne?.
Jorida Tabaku: Ligjet në parlament vijnë me porosi, siç ishte taksa për hirrën e qumështit që prekte prodhuesit e qumështit, për të ndihmuar disa kompani. Ka muaj që diskutohet në Komisionin e Ekonomisë. Lejet zotit Shalsi vijmë apo nuk vijmë në Komision, nuk i marrim sot. Zotit Majko i drejtohem me respekt për moshën dhe eksperiencën. Por kur mosha dhe eksperienca keqpërdoren dhe përdoren emrat e kolegëve tanë, kjo është e turpshme. Mes jush turp është që përdorni debatin e PD në këtë Kuvend. S’ka nevojë që të them unë se sa punë bëj apo se kush është i shitur apo i blerë. Herë tjetër respekt për moshën dhe eksperiencën, kur përdor emra të kolegëve në Parlament.
Eduard Shalsi: Pandi tregoi respekt ndaj tyre. Një koleg deputet mbështeti ndryshimet, një tjetër tha që nuk kemi debatuar, njëri gozhdës dhe tjetri patkoit…Po mundohemi të saktësojmë për të mos lënë asnjë hapësirë për abuzime..
