VLORË-Sotiraq Golemaj dhe Ylli Gerra janë vënë këtë të enjte në prangat e policisë së Vlorës ndërsa në kërkim është shpallur Luan Hoxha pasi akuzohen si autorë të një vjedhjeje të konsiderueshme bizhuterish floriri, të cilat kapin vlerën e 150 mijë euro më 21 mars të këtij viti. Blutë e Vlorës kanë arritur të gjejnë bizhuteritë e vjedhura të cilat janë sekuestruar në cilësinë e provës materiale. Po ashtu ja në sekuestruar pesë aparate celularë dhe dy makina të përdorurura në vjedhje.
NJOFTIMI I POLICISË:
Shërbimet e Komisariatit të Policisë Vlorë, si rezultat i një hetimi të thelluar, proaktiv, të kryer për disa javë, në bashkëpunim me Prokurorinë pranë Gjykatës së Rrethit Gjyqësor Vlorë, për zbardhjen dhe dokumentimin e plotë ligjor të një vjedhjeje të kryer në një banesë në Vlorë, më datë 21.03.2023, si dhe për vënien në pranga të autorëve të saj, kanë organizuar dhe finalizuar operacionin policor të koduar “Storm 4”.
Si rezultat i këtij operacioni, u kapën dhe u vunë në pranga shtetasit S. G., 44 vjeç dhe Y. G., 38 vjeç, të dy banues në Vlorë, si dhe u shpall në kërkim shtetasi L. H., 30 vjeç, banues në Vlorë, për veprën penale “Vjedhja”, kryer në bashkëpunim.
Nga veprimet hetimore rezultoi se këta shtetas, duke vepruar në fomën e grupit, janë autorë të dyshuar të vjedhjes së disa sendeve (bizhuteri floriri) me vlerë rreth 150 000 euro, në një banesë në Vlorë, vjedhje e kryer më datë 21.03.2023.Gjithashtu, nga veprimet hetimore dyshohet se këta shtetas janë autorë edhe të vjedhjeve të tjera të sendeve me vlerë, në banesa, që më pas janë shitur prej tyre.
Vijon puna për zbardhjen dhe dokumentimin e vjedhjeve të tjera që mund të jenë kryer nga këta shtetas, si dhe për kapjen e shtetasit L. H.
