TIRANË– Detaje të reja janë zbardhur këtë të shtunë në lidhje me arrestimin e bujshëm të Ramazan Rrahjës, nipin e deputetit të Partisë Socialiste Rrahman Rraja disa ditë më parë. Euronews Albania shkruan se Rraja u ofroi policëve ta linin të ikte në këmbim të 1 milion eurove. Rraja dhe miku i tij Luis Konomi lëviznin me një automjet të blinduar.
Pas ndërhyjes së policisë në një lokal në zonën e Urës së Gjoles, Ramazan Rraja dhe Luis Konomi tentuan të largohen nga dera e pasme e më pas me një automjet të blinduar që lëviznin. Rrethimi i zonës nga policia bëri që ata të neutralizoheshin ndërsa në momentin e ndalimit Ramazan Rraja u propozoi policive një marrveshje në këmbim të lirisë.
Ramazan Rraja: Ju jap 1 milion euro, vetëm na lini të ikim.
Në momentin e arrestimit Ramazan Rraja mbante në brez një pistoletë të mbushur gati për qitje. Ai cilësohej si një person me rrezikshmëri të lartë shoqërore, Rraja i fshihej arrestimit me urdhër të SPAK prej disa muajsh duke u strehuar në Tiranë, Durrës e Lezhë. 30-vjeçari Rraja, në momentin e arrestimit, ishte në shoqërinë e Luiz Konomit, i cili gjithashtu kërkohej nga Policia. Konomi i njohur si ‘Çupja’ ishte shpallur në kërkim si një nga dy personat që kërcënoi me jetë biznesmenin Eral Myftaraj për t’u tërhequr nga tenderi prej 1 milion eurosh i fituar në Bashkinë e Tiranës.
Ramazan Rraja u shpall në kërkim zyrtarisht pas dëshmisë së dhënë nga i penduari i drejtësisë Nuredin Dumani, i cili rrëfeu para prokurorëve të Prokurorisë së Posaçme Kundër Korrupsionit dhe Krimit të Organizuar (SPAK) se pas ngjarjes së ndodhur më 1 nëntor të vitit 2021, ku iu bë atentat ish-prokurorit Arjan Ndoja ku mbeti i vrarë shoferi i këtij të fundit qëndronte grupi i Plarent Dervishajt.
