Një super Njukasëll ka “asfaltuar” që në pjesë të parë skuadrën e Totenhem Hotspur me rezultatin 5-0 duke dërguar një sinjal të qartë për ndjekësit e saj se kërkon me çdo kusht të kualifikohet në Ligën e Kampionëve.
Magpies nisën fuqishëm që në sekondat e para të takimit duelin përballë miqëve kryeqytetas. Në minutën e dytë, Mërfi, nisi festivalin e golave, me një goditje spektakolare, duke mos i lënë asnjë mundësi portierit kundërshtar.
Pas katër minutash ishte Xhoelinton që shtangu mbrojtjen e Totenhem duke shënuar edhe golin e dytë të takimit. Miqtë nga Londra u dukën të pafuqishëm për të reaguar me vendasit që u zbavitën gjatë 45 minutave të para të takimit.
Mërfi pa asnjë dyshim ishte në ditën e tij më të mirë, me golin e tretë të takimit që ishte një kryevepër. Trajneri i Totenhem, Stelini e shfaqi hapur nervozizmin me skuadrën e tij, e cila dukej sikur kishte shkuar për turizëm në St. James Park.
Tifozët e Njukasëll, patën mundësinë, pa mbaruar ende pjesa e parë që t’i gëzoheshin dy golave të suedezit Aleksander Isak, i cili u tregua i jashtëzakonshëm me dy perlat e tij. Fraksioni i parë i lojës, përfundoi fatmirësisht pa gola të tjerë, me Totenhem që tashmë ka detyrimin e vetëm për të limituar dëmet në pjesën e dytë të takimit ndaj një Njukasëlli që duket si një përbindësh për ta.
