TIRANË– Avokatët e ish-ministrit të Mbrojtjes Fatmir Mediu kanë kërkuar këtë të hënë nga Gjykata e Posaçme Kundër Korrupsionit dhe Krimit të Organizuar që çështja ndaj tij të pushohet për efekt parashikimi. Seanca e sotme ndaj Mediut u shty për në datën 9 maj për shkak të mungesës së dy oprokurorëve, Altin Dumani dhe Arben Kraja.
Ardian Visha: Ai ka të drejtë të jetë i barabartë para ligjit. Kanë kaluar 12 vjet nga fakti penal ndaj zoti Mediu nuk mund të merret i pandehur. Çështja është parashkruar. Pas gati 2 vjetësh hetime të reja të SPAK-ut, që prodhuan zero rezultat, çështja është e pamundur për të vijuar më tej për shkak të parashkrimit.
Prokuroria e Posaçme Kundër Korrupsionit dhje Krimit të Organizuar (SPAK) kërkoi rigjykimin e Mediut, pasi e akuzon si një nga ish zyrtarët përgjegjës për tragjedinë e Gërdecit, me 26 të vrarë dhe qindra të plagosur. Gjykata e Lartë vendosi t’ia dërgojë këtë çështje për kompetencë GJKKO-së, me arsyetimin se me ndryshimet e fundit ligjore në kuadër të reformës në drejtësi, i takon asaj ta shqyrtojë dosjen penale ndaj ish-zyrtarit të lartë.
