SHKODËR– Orjad Tarja, 21 vjeç është arrestuar këtë të martë nga policia e Shkodrës pasi u kap duke transportuar tre emigrantë të paligjshëm. I riu u kap në flagrancë tek rrethrrotullimi i Hotit, Malësi e Madhe. Tashmë ai do të përballet me veprën penale “Ndihma për kalim të paligjshëm të kufijve”.
NJOFTIMI I POLICISË:
Shërbimet e Policisë Kufitare të Hanit të Hotit, në bashkëpunim me ato të Komisariatit të Policisë Malësi e Madhe, nga kontrollet në terren për të parandaluar dhe goditur paligjshmëritë, kanë evidentuar një tjetër rast të transportimit të emigrantëve, kundrejt pagesave, për të kaluar ilegalisht kufirin, rast për të cilin u arrestua shtetasi O. T., 21 vjeç, banues në fshatin Barbullush, Shkodër.
Ky shtetas u kap në flagrancë tek rrethrrotullimi i Hotit, Malësi e Madhe, teksa transportonte me automjet, 3 shtetas nga Pakistani, me qëllim kalimin e kundërligjshëm të kufirit.
Materialet procedurale i kaluan Prokurorisë pranë Gjykatës së Rrethit Gjyqësor Shkodër, për veprime të mëtejshme, për veprën penale “Ndihma për kalim të paligjshëm të kufijve”.
