TIRANË– Shtëpia e ish-deputetit socialist Eduart Ndocaj në Itali është përfshirë nga flakët. Lajmin e ka bërë me dije vetë Ndocaj përmes një postimi në Facebook ku shkruan se ai dhe familja e tij fatmirësisht janë mirë dhe nuk kanë marrë dëmtime. Sipas tij ka qenë ndërhyrja në kohë e zjarrfikësve të Milanos ajo që ka bërë të mundur shmangien e tragjedisë. Ndërkohë këtë të martë në një intervistë për emisonin “ABC e Mëngjesit” Ndocaj ka dhënë detaje nga ngjarja e rëndë.
Eduart Ndocaj: Akoma nuk dihet shkaku i konfirmuar i zjarrit, por në bazë të asaj që u diskutua ishte një shkëndijë elektrike. Ishte ora 02:30 e mesnatës dhe ishim të gjithë në gjumë. Dëgjuam se po ndodhte mbi dhomat e gjumit ku ne jetojmë dhe kujtuam se mos ishte me të vërtetë hajduti dhe jo se ishte një zjarr. Ishte një zhurmë e madhe. Kur dola të shikoj në shkallët e pallatit, kishte ardhur tymi deri në gjysmë dhe pastaj kemi dal të gjithë me shpejtësi dhe thirrëm ndërhyrjen, policinë e zjarrfikësen. Edhe arritëm dolëm ashtu siç ishim sepse natë, të gjithë ishin në gjumë, por të paktën lëndime as tek ne as te vajza nuk kishte. Në katin e fundit është shkrumbuar gjithçka, nuk arrita të merrja dot as teshat e trupit.
POSTIMI I NDOCAJT:
Dua të falënderoj Zotin sepse sot mund të ishte ndryshe, pas një zjarri të papritur në mesnatë! Falenderoj sinqerisht zjarrfikësit e Milanos që arrijnë të shmangin një tragjedi me shërbimin e tyre të menjëhershëm! Fatmirësisht dëmi ka qenë vetëm material!
