Kryeministrja e Serbisë, Ana Bërnabiç, nëpërmjet një cicërime në rrjetin social “Twitter”, ka pretenduar se Bashkimi Evropian – ndërmjetësuesi kryesor në procesin e dialogut mes Kosovës dhe Serbisë – ka shkelur disa marrëveshje, përfshirë edhe atë të Ohrit.
Bërnabiç ka reaguar ndaj deklaratës së zëdhënësit të BE-së për Politikë të Jashtme, Peter Stano, i cili në një konferencë për media se BE-ja është në dijeni që Serbia votoi kundër aplikimit të Kosovës për anëtarësim në Këshill të Evropës.
“Sa për informatë për partnerët tanë nga BE-ja: Serbia merr shënim faktin se BE-ja, sërish, në mënyrë direkte theu të gjitha si në vijim: Marrëveshjen e Brukselit, Marrëveshjen e propozuar nga BE-ja dhe Aneksin e Zbatimit nga Ohri, Statutin e Këshillit të Evropës, Kartën e OKB-së, Rezolutën 1244 të Këshillit të Sigurimit”.
“Përndryshe, më pëlqen pjesa e deklaratës së Peter Stanos për ‘logjikë shumë të thjeshtë’ të negociatave: ‘Secila palë duhet të bëjë diçka në mënyrë që të marrë diçka. Në realitet Prishtina mori më tepër se diçka duke bërë saktësisht asgjë. Kaq për ‘logjikën e thjeshtë’”, shtoi Bërnabiç.
Në fakt, duke votuar kundër dhe duke kërcënuar ata që kanë përkrahur Kosovën në Këshillin e Evropës, Serbia e ka shkelur Marrëveshjen Bazike të arritur fillimisht në Bruksel më 27 shkurt, pastaj në Ohër më 18 mars.
Këshilli i Evropës votoi të hënën pro vendimit që t’ia përcjellin Asamblesë Parlamentare të Këshillit të Evropës (APKE) kërkesën për anëtarësimin e Kosovës në organizatë me 33 vota pro, duke përfshirë shtetet e rajonit si Shqipëria, Mali i Zi, Sllovenia, Maqedonia e Veriut dhe Kroacia, 7 kundër dhe 5 abstenime.
Hungaria, Rumania, Qiproja, Spanja, Azerbajxhani, Gjeorgjia dhe Serbia votuan kundër, kurse Bosnjë dhe Hercegovina, Greqia, Sllovakia, Moldavia dhe Ukraina abstenuan. Ky rezultat tregon se me më shumë se 2/3 e votave kanë qenë pozitive për të kaluar Kosova këtë fazë të procesit të gjatë të anëtarësimit në KiE.
Ndryshe, në nenin katër të Marrëveshjes së Ohrit thuhet se palët nisen nga supozimi se asnjëra nga këto të dyja nuk mund ta përfaqësojë palën tjetër në sferën ndërkombëtare apo të veprojë në emër të saj dhe se Serbia nuk do ta kundërshtojë anëtarësimin e Kosovës në asnjë organizatë ndërkombëtare.
Marrëveshjes – ashtu sikurse më 27 shkurt në Bruksel – i ka munguar një aspekt i rëndësishëm: nënshkrimet e dy lojtarëve kryesorë – kryeministrit të Kosovës, Albin Kurti dhe presidentit të Serbisë, Aleksandër Vuçiç. Ky aspekt është vlerësuar nga njohësit e çështjeve politike si pengesë për zbatimin e plotë të marrëveshjes.
Një muaj ka kaluar prejse Kosova dhe Serbia janë pajtuar për zbatimin Marrëveshjes së Ohrit, por kjo marrëveshje ende nuk e ka arritur asnjë efekt në praktikë. Serbia nuk ka ndryshuar qasjen ndaj Kosovës. Madje, në të dy rastet ka vepruar në kundërshtim me këtë marrëveshje.
