Sali Berisha ka rikthyer sulmet ndaj ministres së Jashtme, Olta Xhaçka. Ai ka prezantuar kandidatin e bashkisë Shijak, Rezart Tusha, ku deklaroi se 80% e atyre 1 milionë shqiptarëve që janë larguar në 8 vite janë të rinj, janë nën moshën 30 vjeç. Sipas tij, të rinjtë ikin sepse burri i ministres del investitor strategjik.
“Këtu pasuritë shndërrohen jo në begati për qytetarët, por në mallkim, sepse investitori strategjik, burri i ministres merr me 1 euro, pasuri përrallore në bregdet. Kurse biznesmeni i ndershëm nëse do të ndërtojë diçka në bregdet, detyrohet ta blejë me 200-300 euro metrin katror, ndërsa ai që e ka marrë me 1 euro nuk paguan asnjë taksë, nuk paguan as TVSH, kurse këtij detyrohet të paguajë qimet e kokës. Pra e falimenton. Nuk ka shans, nuk mund të konkurrojë. Në çdo fushë është kjo. A mund të vazhdohet në këtë mënyrë miq? Ndryshimi pra është jetik”, tha Berisha në Shijak.
