TIRANË– Kryeministri Edi Rama ka folur për gazetarët pas përfundimit të mbledhjes së Kryesisë të zhvilluar në selinë e Partisë Socialiste. Ai u pyet nga gazetarët në lidhje me deklaratat e fundit të tij ku iu bën “presion” qytetarëve se nëse votojnë kandidatët e opozitës atëherë s’kanë punë me të. Për këtë deklaratë Rama tha se e ka pasur në kontekstin se bashkëpunimi me kryedemokratin Sali Berisha është i pamundur pasi ai mban “damkën” non-grata. Po ashtu gjatë fjalë së tij kryesocialisti sulmoi kreun e Bashkisë së Shkodrës Bardh Spahia.
Edi Rama: Kam folur për kukulla të një çifti, kemi një non grata të shpallur nga aleati ynë më i madh strategjik. Kemi thirrje nga Shtetet e Bashkuara për të bërë më shumë kujdes, natyrisht është zgjedhje e shqiptarëve, por janë dhe aleatët. Ata vendosin se çfarë natyre kanë marrëdhëniet e tyre me në në momentin që një individ i një rëndësie të madhe në këto 30 vite mban damkën mbi shpinë që tregon se është i padëshirueshëm. Ky nuk është presion, por është një thirrje për tu thënë njerëzve që shikoni që bashkëpunimi do të jetë i pamundur, jo nga mungesa e dëshirës, por për faktin që këta kandidatë janë aty për të ngritur barrikada dhe për të trajtuar bashkitë si pengje lufte. Ne do të bëjmë tonën, si me Shkodrën. Shkodra është i vetmi qytet i Shqipërisë ku plehrat rrinë me ditë të tëra në kazan dhe nuk mblidhen. Njësoj siç bëhej në të gjithë qytetet e tjera të Shqipërisë, para se t’i merrnim ne. Është një forcë politike që i ka treguar se çfarë di të bëjë, jo se i kemi bërë të gjitha mirë, por jemi përpjekur. Për të gjitha këto arsye, unë besoj që siç hoqa unë apandesiitn tim, duhen hequr këta që janë zorra qorre.
