TIRANË– Kryetari i Partisë Demokratike Sali Berisha ka komentuar këtë të mërkurë vendimin e Belind Këlliçit për të vendosur posterat në rrugët e Tiranës ku ai shfaqej me gishtin e mesit lart. Veprim që u kundërshtua nga shumë qytetarë. Ndërkohë për Berishën ai veprim është pak pasi sipas tij ata që vjedhin qytetarët meritojnë më shumë. Po ashtu lideri demokrat u shpreh se dënon me forcë manipulimin mediatik të atyre që ai i quan ‘myftinj mafiozë’ që një ditë më parë dolën kundër Këlliçit për posterat.
Sali Berisha: Ata që vjedhin qytetarët, meritojnë jo gishtin, por shumë herë më tepër. Ata që vjedhin qytetarët, meritojnë çdo formë diskreditimi. Ata që vjedhin qytetarët dhe mbrohen nga Edi Rama dhe drejtësia e tij, atë e kanë pak. Meritojnë çdo gjë tjetër. Çdo njeri duhet të marrë parasysh, një njeri ka imagjinatën e vet dhe shprehjen e vet. Po të isha unë, ku e di ç’mund të zgjidhja unë. Ajo më duket pak bile, të them të vërtetën. Dënoj me ashpërsinë më të madhe manipulimin mediatik të atyre mafiozëve që flasin në emër të myftive, anonimë. Dënoj ndërhyrjen e George Soros dhe parave të tij në fushatë, sepse rrjeti i organizatave të Sorosit, pasi e sheh se Erion Veliaj po përfundon aty ku e meriton, po hiqet si i revoltuar. Erion Veliaj është i përfunduar. Përdorimi i parave të Sorosit nga këto organizata, nga ndërhyrja e tyre kriminale në fushatë elektorale, është e dënueshme. Ku ishin këta kur Edi Rama përdori fjalorin më të paimagjinueshëm në parlamentin shqiptar ndaj grave? E tëra është një zhurmë e turpshme elektorale. Ata që vjedhin qytetarët, meritojnë më shumë se aq.
