Berisha ‘non grata’ nga Britania e Madhe, Strazimiri: Johnson i bëri dy dëme dhe dy ndere Shqipërisë! Misionarin e vret, por betejën me të s’e fiton dot
Sali Berisha pranoi një ditë më parë se është shpallur ‘non grata’ nga Britania e Madhe dhe nuk kanë munguar reagimet nga mbështetësit e tij. Njëri prej tyre është Gent Strazimiri, i cili thotë se Britanisë iu bënë dy dëme dhe dy ndere Shqipërisë. Sipas tij, Boris Johnson pranoi Ramën, të cilin e akuzon se furnizon Londrën me të rinj që shkojnë për të punuar në shtëpi bari.
“Dy dëme Britanisë dhe dy ndere Shqipërisë, nga një ish-kryeministër i shkarkuar si i padenjë!
I përzënë fillimisht nga ministrat e tij, si një mashtrues i padenjë për të drejtuar, me qokat e fundit që bëri, Boris Johnson i shkaktoi qëllimisht vendit të tij dy dëme para se të zbrazte zyrën.
Së pari, i la në preher një “grata” si Edi Rama, që jo vetëm furnizon Londrën me punëtorë “shtëpish bari” e kokaine, por edhe i nxit që të vazhdojnë duke u siguruar me ligj pastrimin e të ardhurave nga aktiviteti kriminal. Pasojat e tij do të shihen kur “çunat e Londrës” do mbërrijnë në atë fazën ku mbërrijnë të gjitha organizatat kriminale: * të vriten me njeri-tjetrin mu nën dhomën e gjumit të Mbretëreshës….” – shkruan Strazimiri.
Ndërsa dëmi i dytë sipas tij lidhet me Berishën pasi thotë se kanë hapur një betejë të humbur që pa nisur. Në reagimin e tij e cilëson ish kryeministrin si misionar ndërsa shton: “Historia e njerëzimit dëshmon se misionarin mund ta vrasësh, por betejën me të nuk e fiton dot…”
Në përfundim përdor shprehjen e fundit të Boris Johnson para se të linte postin e kryeministrit duke i thënë se i bëri nder që i zgjoi nga gjumi për të vendosur fatin ndërsa Ramën e bëri hall të Britanisë.
“Dëmi i dytë, është hapja e një beteje politike të humbur që pa nisur, me një misionar të lirisë e së vërtetës si Sali Berisha, jo me politikanin Sali Berisha. Ai që të qëndron përballë në emër të së të vërtetës, është misionar i saj edhe nëse merret me politikë. Betejat që politika e pushteti nis me misionarët e lirisë janë ato më të pafatat. Qysh se ekziston pushteti, ekziston edhe misionari i lirisë përballë tij.
Që kur është shfaqur pushteti, aty mbiu përballë tij edhe misionari anti-arbitraritet e anti-padrejtësi, emancipuesi e çlirimtari i mendjeve dhe ndërgjegjeve përmes mbrojtjes pa kompromis politik, të së vërtetës. Historia e njerëzimit dëshmon se misionarin mund ta vrasësh, por betejën me të nuk e fiton dot…
Jezu Krishti e Muhameti, Giordano Bruno e Galilei, Vaclav Havel e Ibrahim Rugova, Mahatma Ghandi e Mandela, janë shembuj të misionarëve që kanë triumfuar mbi perandoritë e pushtetet, në betejat politike që ato u kanë shpallur, pavarësisht nëse ishin apo jo politikanë.
Në rastin e Britanisë, ta fusësh në një tjetër beteje me një misionar lirie në Evropë vetëm 70 vjet nga humbja e turpshme përballë një misionari si në Indi, duhet të jesh vërtetë pervers dhe i padenjë…
Për më tepër, kur e bën si qokë ndaj një armiku të çertifikuar të ekonomisë britanike si George Soros. “Hasta la vista” Boris, se ne na ke bëre 2 ndere:
* i re sërish këmbanës së alarmit që të zgjohemi nga gjumi, e fatet tona t’i vendosim vetë, pa pritur një si ti që të na “stilizojë” jetët me kujdesin që tregon për krehjen e kokës së tij… * Edi Ramën e bëre zyrtarisht edhe hall të Britanisë, dhe kjo na e lehtëson punën…”- shkroi Strazimiri.
