TIRANË– Prokuroria e Tiranës ka mohuar këtë të premte lajmin e publikuar ditën e djeshme në disa media në lidhje me Erion Ismailin, shefin e Krimit Ekonomik në Policinë e Tiranës, i cili u akuzua se ka marrë rryshfet 10 mijë euro çdo muaj për të lejuar aktivitetin e paligjshëm të një call center-i me bursat mashtruese ndaj qytetarëve evropian. Organi i akuzës përmes një reagimi zyrtar bën me dije se nuk ka asnjë veprim hetimor për Ismailin apo një dosje në ngarkim të tij.
REAGIMI:
Prokuroria pranë Gjykatës së Rrethit Gjyqësorë Tiranë, duke marr shkas nga interesimi i mediave të ndryshme, si edhe nga lajmet që kanë qarkulluar nëpër media dhe portale mediatike, në lidhje me shtetasin Erion Ismaili me detyrë Shefi i Sektorit për Hetimin e Krimit Ekonomik dhe Financiar, vlerëson të nevojshme që të informojmë opinionin publik që ky lajm nuk është i vërtetë. Prokuroria pranë Gjykatës së Rrethit Gjyqësorë Tiranë , nuk ka filluar veprime hetimore ndaj shtetasit Erion Ismaili në lidhje me çështjen penale nr.2306 të vitit 2023, ku rezultojnë të arrestuar shtetasit E.S, F.Q dhe M.K. Kërkojmë mirëkuptimin e medias, që para se të publikojë lajme që i përkasin çështjeve penale, që po hetohen nga Prokuroria pranë Gjykatës së Rrethit Gjyqësorë Tiranë, të kërkojë informacion në mënyrë zyrtare, me qëllim informimin e saktë të opinionit publik.
