TIRANË– Detaje të reja kanë dalë në dritë në lidhje me 31-vjeçarin Gerti Shehu, i cili ditën e sotme goditi me grusht në fytyrë kryetarin e Partisë Demokratike Sali Berisha gjatë kohës që ky i fundit po marshonte në protestë. Nëna e tij ka reaguar për herë të parë në lidhje me ngjarjen. Ajo shprehet se i biri vuan nga probleme të shëndetit mendor dhe se para dhjetë ditësh ai ka qenë tek mjeku psikiatër.
“Nuk është përdorur djali im. Nuk ka qenë mirë, por nuk është shfrytëzuar nga asnjë. Nuk ka pasur asnjë simpati politike. Ai ka pasur problemet e veta, as për të votuar nuk shkon. Në protesta nuk ka marrë pjesë. Më vjen keq që shfrytëzojnë fatkeqësitë e tjetrit. Por ashtu i ka thënë sëmundja. Nuk kam takuar akoma djalin, më kanë thënë që është mirë dhe është nën kujdestarinë mjekëve. Nuk ka shfaqur shenja dhune ditët e fundit. Ai kurohet, pi ilaçet por e shikoja të mbyllur. Është vizituar para 1 jave, 10 ditësh ai i jepte ilaçet. Unë djalin kam 5 vite që e shoqëroj për mjekim. Ka qenë me keq dhe tani është duke u përmirësuar,”- u shpreh nëna.
Por ndesh me deklaratën e nënës bie pohimi i mjekut Sadik Lala, i cili ka thënë se Gerti Shehu kishte 2-3 muaj që nuk kishte shkuar për vizitë. Sipas mjekut kjo mund të ketë qenë dhe arsyeja e degradimit të shëndetit të tij.
“Po raporti mjekësor është autentik, është lëshuar nga unë. Gert Shehu është trajtuar nga unë. Nuk ka qenë i rregullt në marrjen e mjekimeve dhe bënte sjellje agresive. Tek unë ka gati 2-3 muaj që s’ka ardhur për vizitë,”-tha mjeku në prononcimin e tij lidhur me rastin.
Gerti Shehu është 31-vjeçari që goditi me grusht kreun e Partisë Demokratike Sali Berisha ditën e sotme. Ai u fut mes turmës dhe në një moment u afrua me shpejtësi dhe godtit Berishën. Si pasojë e sulmit kryedemokrati ra përtokë dhe u ngrit i gjakosur në fytyrë dhe me sy të nxirë. Shehu u neutralizua nga truprojat dhe protestuesit në shesh. Më pas ai u arrestua nga Policia. Sipas Policisë ai është person me skedë të pasur kriminale pasi është akuzuar më parë për plagosje, prishje të qetësisë publike dhe trafikim të lëndëve narkotike.
