TIRANË– Drejtori i Përgjithshëm i Policisë së Shtetit Muhamet Rrumbullaku ka reaguar pas deklaratës së kryetarit të Partisë Demokratike Sali Berisha, i cili tha se i riu që e sulmoi atë sot gjatë protestës, Gert Shehu figuron si agjent në policinë kriminale. Rrumbullaku tha se ai nuk ka qenë asnjëhërë pjesë në asnjë strukturë të policisë ndërkohë që shtoi se dokumenti për shëndetin e tij mendor është dhënë për mediat nga vetë familjarët e tij. Ai shtoi se mjeku po jep shpjegime pranë autoriteteve të Policisë Gjyqësore.
“Në lidhje me incidentin ndaj deputetit Sali Berisha, policia reagoi menjëherë për të ndaluar agresorin. Po vazhdojnë hetimet për të përcaktuar shkaqet e sulmit. Në lidhje me deklaratën ku pohohet se ai është agjent policie sqarojmë se Gert Shehu nuk ka qenë ndonjëherë dhe nuk është agjent i policisë kriminale në asnjë strukturat të policisë së shtetit. Nuk është përdorur asnjëherë si infiltruar. Dokumenti për shëndetin mendor është dhënë për mediat nga vetë familjarët e tij. Policia përgënjeshtron deklaratat që nuk ndihmojnë në zbardhjen e të vërtetës. Policia është e angazhuar për zbardhjen e të gjithë rrethanave të ngjarjes. Mjeku po jep shpjegime pranë autoriteteve të Policisë Gjyqësore”, tha Rrumbullaku.
Gerti Shehu është 31-vjeçari që goditi me grusht kreun e Partisë Demokratike Sali Berisha ditën e sotme. Ai u fut mes turmës dhe në një moment u afrua me shpejtësi dhe godtit Berishën. Si pasojë e sulmit kryedemokrati ra përtokë dhe u ngrit i gjakosur në fytyrë dhe me sy të nxirë. Shehu u neutralizua nga truprojat dhe protestuesit në shesh. Më pas ai u arrestua nga Policia. Sipas Policisë ai është person me skedë të pasur kriminale pasi është akuzuar më parë për plagosje, prishje të qetësisë publike dhe trafikim të lëndëve narkotike.
