TIRANË– Partia Demokratike ka publikuar këtë të shtunë spotin elektoral të fushatës për zgjedhjet vendore të 14 majit. Në video shfaqet kryetari i PD-së Sali Berisha, i cili shkruan një letër drejtuar të gjithë shqiptarëve. Në letrën e tij Berisha shkruan se vota për kryeministrin Edi Rama është një votë për shpopullimin, që siç shkruan ai është dhe plaga më e madhe e Shqipërisë sot. Në fund ai u bën thirrje gjithë qytetarëve që të votojnë kandidatët e koalicionit “Bashkë Fitojmë” në të gjithë vendin.
LETRA E PLOTË:
Kjo letër e hapur, i drejtohet çdo shqiptari. Demokratë, socialistë, dhe të pa parti. Unë, Sali Berisha, kam patur nderin t’ju shërbej si president, si kryeministër. Kam kaluar shumë fushata elektorale ndër vite. Por kurrë, në asnjë fushatë, kurrë nuk është diskutuar ekzistenca e Shqipërisë, siç po ndodh në këto zgjedhje. Ne kemi humbur 33% të popullsisë në 10 vite. 83% të atyre që kanë mbetur, kerkojnë të largohen. Qytetet tona po shuhen. Rinia po zhduket. Kurrë nuk ka qenë Shqipëria në rrezik si ky. E vërteta është se sa më shume pushtet mbledh Edi Rama, aq më shumë ikin shqiptarët Sepse me këtë pushtet, ai krijon kushtet për dëbimin tuaj. Sot, shqiptarët janë ende shumicë, por jo për shumë gjatë. 83% e tyre kërkojnë të ikin. Vota për Edi Ramën nxitshpopullimin. Kur të mbeten shqiptarët e fundit, do të jetë shumë vonë për të shpëtuar Shqipërinë. Prandaj në këto zgjedhje, bashkimi i çdo shqiptari është jetik. Socialistë, demokratë, i pa parti. Jeni njësoj të vjedhur. Të gjithë keni humbur 1/3 të njerëzve të dashur. Shqipëria e të gjithëve është në rrezik. Le ta shpëtojmë atë. Në 14 Maj nuk votojmë vetëm për Bashkitë. Votojmë kundër shpopullimit.
