MAT- Kryeministri i Shqipërise, Edi Rama gjatë një fjalimi me qytetarët në Mat kishte në fokus Sali Berishën dhe shpalljen e tij non-grata.
Mes akuzave të Berishës, se kjo është një vepër e tij, kryeministri Edi Rama e ka ripërsëritur edhe njëherë se nuk “ka gisht”. Për Ramën, Berisha është një njeri i padëshirueshëm nga partnerët ndërkombëtarë, e për rrjedhojë i tillë duhet të jetë edhe për shqiptarët.
“Ultra komunist, por jo nga ato të ndershmit që për karrierë dhe pushtet janë gati të ndërrojnë komplet maskën dhe ajo maskë i është çjerrë nga SHBA-ja dhe i është bërë një maskë e papërdorshme dhe e padëshiruar në SHBA, e pakonceptueshme se si ka akoma njerëz të ndershëm, për hir të së vërtetës. Për ata njerëz që në emër të së shkuarës vazhdojnë të mbajnë veten peng, të reflektojnë. Gjyshërit demokratë do të rrotullohen në varr kur mbesat dhe nipërit e tyre do u japin votën një force që është kthyer në pengun e një njeriu të vetëm për hallet personale dhe problemeve me drejtësinë, i është dhënë besim nga ndërkombëtarët dhe i turpëroi të gjithë. Lëreni mbrapa atë që është i dënuar që të jetë mbrapa. S’ka shqiptar që ta hajë se u shpall Non grata se e kam bërë unë, se kam lëvizur Amerikën, sikur ta kisha këtë fuqi, nuk do kërkoja vota për Gonin, SHBA-ja nuk është kompani që kontraktohet me çfarëdo qoftë”, tha Rama.
