TIRANË– Kryeministri Edi Rama ka ripërsëritur kërcënimin ndaj kandidatëve të opozitës nëse zgjidhen në krye të bashkive të vendit në zgjedhjet vendore të 14 majit. Rama tha këtë të enjte në ”Real Story” se dera e bashkëpunimit me ta është e mbyllur.
Edi Rama: Do mbyllet dera e bashkëpunimit sepse është e pamundur që të bashkëpunosh me ta, jo se ne nuk duam të ndihmojmë ato komunitete. Sepse eksperienca ka treguar se bashkëpunimi ka qenë i vështirë, por tashmë është i pamundur. Ne kemi prej disa kohësh kompanitë që duhet të rifillojnë punën për ujin në bashkinë e Shkodrës. Aty financimi është i qeverisë, projeketet janë bërë nga qeveria, kontraktorët janë gati por bashkia nuk na jep leje. Ose për shembull, rruga Shëngjin Velipojë, pengohet prej gati një viti për shkak të përgatitjes së dokumentacionit dhe është çliruar Lezha dhe po bllokohet nga Lezha. Rruga Shkodër-Theth kalon nëpërmjet Bogës, Boga është në Malësi të Madhe, Thethi në Shkodër, Boga është e pastër, Thethi është me plehra.
