TIRANË– Gerti Shehu, 31-vjeçari që goditi me grusht në fytyrë kryetarin e Partisë Demokartike Sali Berisha ka dhënë dëshminë e parë para oficerëve të Policisë. Mësohet se ai është shprehur se do të flasë në një moment të dytë me arsyetimin se nuk ndihet mirë nga gjendja shëndetësore.
“Do flas në një moment të dytë, sepse nuk jam mirë nga gjendja shëndetësorë”, ka thënë ai.
Ai ndodhet në Spitalin e Truamës nën kujdesin e mjekëve, të cilët kanë bërë të ditur se ai ka marrë lëndime në hundë dhe nuk ka rrezik për jetën. Ndaj tij Prokuroria e Tiranës ka ngritur dy akuza, konkretisht, ‘goditje për shkak të detyrës dhe të plagosjes së lehtë”.
Gerti Shehu goditi me grusht kreun e Partisë Demokratike Sali Berisha ditën e djeshme. Ai u fut mes turmës dhe në një moment u afrua me shpejtësi dhe godtit Berishën. Si pasojë e sulmit kryedemokrati ra përtokë dhe u ngrit i gjakosur në fytyrë dhe me sy të nxirë. Shehu u neutralizua nga truprojat dhe protestuesit në shesh. Më pas ai u arrestua nga Policia. Sipas Policisë ai është person me skedë të pasur kriminale pasi është akuzuar më parë për plagosje, prishje të qetësisë publike dhe trafikim të lëndëve narkotike. Atij iu komunikua masa e arrestit me burg ditën e sotme në Spitalin e Traumës ku ndodhet për të marrë mjekim pasi pas incidentit u dhunua nga protestuesit.
