Napoli ka arritur pas tre dekadash të fitojë më në fund titullin e shumëpritur të Serisë A.
Të kaltërve i mjaftoi barazimi një me një në fushën e Udineses, për të siguruar matematikisht Scudetton.
Takimi nisi në malore për djemtë e Spallettit të cilët e panë veten në disavantazh, me Udinesen që realizoi me anë të Lovric në minutën e 13-të.
Napoli nuk u demoralizua, duke kërkuar menjëherë golin e barazimit por bardhezinjtë friulanë, u mbrojtën mirë, duke e mbyllur pjesën e parë në epërsi.
Në pjesën e dytë, mbrojtja e Udineses rezistoi deri në minutën e 52-të, kur Victor Osimhen realizoi golin e barazimit. Ky gol ishte më i rëndësishmi në karrierën e sulmuesit nigerian, sepse në fund rezultoi goli i titullit që kishte nga viti 1990 që nuk fitohej nga Napoli.
Për skuadrën jugore ky është tituli i tretë, ndërsa për trajnerin Luciano Spalletti, ky është kampionati i parë, pa dyshimin më të vogël, një shpërblim për karrierën e gjatë të teknikut livornez, i cili është tashmë pjesë e historisë së kampionatit Italian.
Festa pritet të nisë shumë shpejt në rrugët e Napolit e pritet të zgjasë për shumë kohë.
