TIRANË– Pedagogu Shpend Gashi në një rrëfim për “Stay Tuned” me moderatoren Valbona Mhilli tregoi se shpesh e kritikon veten për mungesën e disiplinës dhe konsistencës duke shtuar se i thotë vetes të mos bëhet emocional dhe të punojë shumë. Për Gashin talenti është zero nëse nuk punon.
“Më shumë e kritikoj veten për mungesë konsistence dhe disiplinimi, ndonjëherë më ikën. Jemi 3 Shpendë, Shpendi 8 vjeç, Shpendi 80 vjeç dhe Uni që nuk ka emër, ai zëri i brendshëm që ti mendon se je ti, por nuk je ti, mbase subkoshienca. 8-vjeçari zihet me 80-vjeçari dhe ky ndoshta është mesorja e artë që i jep të drejtë një herë njërit dhe një herë tjetrit, por ka raste kur nuk dëgjohet fare, ngelen dy. Ka raste kur pozicionohet vetëm një dhe mban të gjithë skenën. I them vetes mos u bëj emocional, duhet të djersitësh shumë. Talenti është zero po nuk pati punë. Unë kam talent, e dalloj potencialin tim, por po nuk e punova ditë për ditë të firon. Kam parë njerëz shumë herë më të mëdhenj se unë, shumë herë më inteligjentë sesa unë, me më botë shpirtërore sesa unë dhe sot s’janë askushi sepse patën një lloj vetë kënaqësie: Shiko unë arrita Olimpin”.
