TIRANË– Drejtori i Zyrës së Shtypit në Partinë Demokratike Alfred Lela ka ndarë sot detaje të reja në lidhje me sulmin e ndodhur ditën e djeshme ndaj kryedemokratit Sali Berisha, i cili u godit me grusht në fytyrë nga 31-vjeçari Gerti Shehu.
Në një komunikim për ‘Ness 24’ Lela tha se aktualisht gjendja e Berishës është e mirë dhe po pushon në shtëpinë e tij. Duke mos dashur të japë më shumë detaje për faktin nëse Berisha i ishte nënshtruar ndonjë vizite mjekësore, Lela tha se nuk do të donte të ndalej te kjo çështje.
“Gjendja e doktor Berishës është shumë e mirë, duke parë edhe sa i shpejtë në kohë ishte reagimi i tij. U ngrit foli dy herë dhe më pas konferencë shtypi në seli. Sot është duke pushuar në shtëpi dhe është shumë mirë”, tha ai.
Lela shtoi se sulmi ndaj Sali Berishës ishte tronditës pasi po goditej lideri i opozitës në ditën e Samitit të Bashkimit Europian.
“Ishte anormale, brutale, tronditëse. Po goditej lideri i opozitës që po shkonte në krye të protestës paqësore në ditën kur ishte edhe Samiti i BE. Po goditej shefi i një opozite që të gjithë jemi dëshmitarë është skajuar në ring nga pushteti që i kontrollon të gjitha dhe që po bën çmos që ta nxjerrë jashtë. Po goditej kreu i një pjesë të popullit shqiptar që përballet me arrogancën e mazhorancës. Protesta ndalohen në Korenë e Veriut dhe në Rusi”, tha ai.
