KORÇË– Një 35-vjeçar i identifikuar me inicialet G.M është vënë në prangat e Policisë së Korçës në orët e para të mëngjesit pasi u kap duke transportuar pesë emigrantë të paligjshëm kundrejt pagesës. Në momentin që ka parë Policinë në aksin rrugor “Korçë-Pogradec” ai ka tentuar të largohet por është kapur më vonë.
NJOFTIMI I POLICISË:
Shërbimet e Policisë, në bazë të informacioneve të siguruara nga inteligjenca informative, për një shtetas që do të transportonte kundrejt pagesës, shtetas të huaj, me qëllim që ata të kalonin ilegalisht kufirin, organizuan veprimet dhe në aksin rrugor “Korçë-Pogradec”, pranë vendit të quajtur Qafë Plloçë, bënë të mundur lokalizimin e automjetit të dyshuar. Shtetasi G. M., sapo ka konstatuar se ishte në ndjekje nga Policia, ka tentuar të largohet me shpejtësi me automjet, duke mos iu bindur urdhrit të punonjësve të Policisë, për të ndaluar, por menjëherë është kapur dhe neutralizuar. Gjatë kontrollit në automjetin tip “Benz”, u gjetën 5 emigrantë të paligjshëm. Nga tërësia e veprimeve hetimore dhe provat e siguruara, rezultoi se 35-vjeçari do t’i transportonte emigrantët, kundrejt pagesës, me qëllim që të kalonin në mënyrë të paligjshme drejt vendeve të BE-së. Në cilësinë e provës materiale u sekuestruan automjeti, një aparat celular dhe një shumë parash. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
