PUKË– Kryetari i Partisë së Lirisë Ilir Meta duket optimist sa i përket fitores së opozitës në zgjedhjet vendore të 14 majit. Gjatë një takimi që zhvilloi këtë të enjte në Pukë Meta tha se koalicioni “Bashkë Fitojmë” do të marrë një rezultat 5 me 0 në qarkun e Shkodrës. Gjatë fjalës së tij kreu i PL-së nuk i kurseu akuzat ndaj kryeministrit Edi Rama për të cilin tha se për shkak të politikave të tij shpopulluese të rinjtë janë larguar nga vendi.
Ilir Meta: “Është kënaqësia ime që në ditën e parafundit të fushatës zgjedhore të jem këtu në Pukë dhe njëkohësisht t’i jap gjithë Shqipërisë mesazhin e fitores 5 me 0 në qarkun e Shkodrës. Ju jeni të paduruar për fitore sepse po të vazhdojë, që është e pamundur, përfaqësuesi i Edi Ramës këtu në Pukë edhe një mandat tjetër, pas 4 vitesh do ngelet vetëm ai aty te Turizmi dhe ca bangladeshas si kamarierë. Në 10 vjet që ai drejton, bashkë me Edi Ramën popullsia në Pukë është përgjysmuar. Është përgjysmuar sepse është zero mbështetja për bujqësinë, është zero mbështetja për blegtorinë, është zero mbështetja për turizmin, për bujtinat. Vetëm një bujtinë ekziston sot në Pukë, edhe ajo e bërë me aq shumë mundim e sakrifica sa është penduar rrezik edhe i zoti i saj sot. Një nga angazhimet madhore të Partisë së Lirisë dhe Partisë Demokratike me në krye profesor Sali Berishën, do të bëjmë referendumet pastaj ne. Mirëpo unë jam shumë i lumtur që referendumin lokaj e gjej këtu tek programi i z.Rrok Dodaj.
