TIRANË– Kryetari i Partisë së Lirisë Ilir Meta ka reaguar këtë të premte pas arrestimit të kandidatit të koalicionit “Bashkë Fitojmë” Fredi Bejleri në Himarë pak pas mesanatës nën akuzën e shit-blerjes së votës. Përmes një postimi në rrjetet soiciale Meta bën thirrje për pjesëmarrje masive në zgjedhje si dhe lëshon akuza ndaj Prokurorsë së Posaçme (SPAK).
REAGIMI:
Pjesëmarrje, pjesëmarrje dhe vetëm pjesëmarrje! Ky ështe ilaçi ndaj një Kryeministri dhe një regjimi, që po jep shpirt dhe të tmerruar nga vota e lirë. Ndërsa SPAK nuk vepron ndaj dhjetëra Kryetarëve të Bashkive, që shkelin ligjin dhe vërtetohen si fajtorë, pas sulmeve të paramenduara dhe të inskenuara të Kryeministrit delinkuent, rrëmbehet pas mesnate në mënyrë mafioze Kandidati për Kryetar i Bashkisë në Himarë. Të gjithë qytetarët dhe strukturat opozitare në Himarë të jenë në këmbë, të fuqizojnë në maksimum fushatën dhe të intensifikojnë kontaktet me zgjedhësit për të votuar masivisht dhe për t’i dhënë goditjen përfundimtare Kryeministrit, grabitësit dhe shkatërruesit më të madh për qëllime mafioze të pronave në Himarë dhe gjithë bregdetit të Jugut nga Vlora deri në Ksamil.
