Të apasionuarit pas futbollit, rezidentë në Dallas do të kenë mundësinë, që të shohin nga afër futbollistët më të talentuar të planetit.
Nga çfarë raporton gazeta “AS”, më 29 korrik 2023, Real Madrid e FC Barcelona do të ndeshen në stadiumin “Cotton Bowl” të metropolit teksan, në kuadër të fazës përgatitore parasezonale që këto dy ekipe do të zhvillojnë në Shtetet e Bashkuara të Amerikës.
Kjo nuk është miqësorja e parë mes Real Madrid e Barcelona. Në 2018, të dyja klubet zhvilluan ndeshjen e tyre të parë në Amerikë, me Barcelonën që triumfoi 3-2 në ndeshjen e luajtur në Miami të Floridas.
Përsa i përket miqësores së fundit, vitin e kaluar, të dy ekipet u takuan më 24 korrik, në Las Vegas, me Barcelonën që triumfoi përseri, kësaj radhe 1-0 falë golit të realizuar nga Raphinha.
“Los Blancos” do të kenë një fazë përgatitore të mbushur me takime elitare, duke parë që përveç rivalëve katalanas, do të ndeshen edhe me Milan, Manchester United dhe Juventus.
