TIRANË– Kryetari i Partisë Demokratike Sali Berisha ka kërkuar nga Komisioni Qëndror i Zgjedhjeve që të kryhet auditimi i pajisjeve të votimit elektronik në tre bashkitë ku u aplikua një proces i tillë. Sipas Berishës ka pasur problematika të shumta lidhur me këtë proces, të cilat sipas tij janë denoncuar nga PD dhe nga mediat. Ndërsa sa i përket pranimit ose jo të procesit të zgjedhjeve Berisha nuk dha detaje por lëshoi akuza ndaj kryeministrit Edi Rama për të cilin tha se deformoi vullnetin e votuesve.
Sali Berisha: Ne do të mbrojmë votën. Ai bëri gjithçka që ne të mos hymë në proces. Nuk mundem unë që me apriori të zhvilloj betejat, duhen fakte dhe argumenta. E kam të pamundur, sado që ishte lehtësisht e parashikueshme, për mua, parashikimi dhe paragjykimi nuk janë hipoteza. Unë udhëhiqem nga faktet. Në këtë rast, Rama, u them unë ju ka bërë gjithçka që nuk duhet të bënte që të deformonte një proces zgjedhor që duhet të ishte normal. Për këto rezultate ka disa kundërshtime shumë të forta. Unë kërkoj nga KQZ që të bëjë auditimin e këtyre aparaturave. Kodi Zgjedhor ka parashikimet e veta dhe të sakta sesi mund të trajtohet dyshimi. PD do të ushtrojë të gjitha dhe do të kërkojë zbatimin e të gjitha ligjeve. Ky quhet rezultat paraprak. Kanë dalë 2 gjëra, kanë paraqitur mediat se kanë votuar kandidatë dhe u kanë dalë emra të tjerë. Kjo kërkon auditimin e aparaturës. Unë jam besimplotë në rezultatin e këtyre zgjedhjeve. Nuk kemi pasur qëllim për dekurajimin e zgjedhësve. Për zgjedhje lokale kjo nuk është pjesëmarrje e keqe. Kursi i euros nuk ka arritur kurrë as në gushtin dhe korrikun më turistik të vendit. E kemi evidentuar këtë. Velipoja ishte në vendpushtim sot. Autokollona krimi, kalonin nga një rrugë në tjetrën dhe njerëzit nuk guxonin t’i fotografonin për shkak të kamerave.
