TIRANË– Fredi Beleri, kandidati i ‘Bashkë Fitojnë’ fitoi Himarën në kushte jo të zakonshme por sipas ligjit, kapja në flagrancë në shit-blerjen e votave nuk do ta lejojë të jetë në krye të kësaj bashkie. Në një prononcim për “News Zone” Avokati Spartak Ngjela theksoi se nëse Beleri merr pafajësinë në SPAK, atëherë do vijojë mandatin si Kryetar Bashkie i Himarës. Por kjo, sipas avokatit, është pamundësi absolute, sepse Beleri është kapur në flagrancë, dhe nuk ka gjykatë që t’i japë pafajësi.
“Nëse Beleri merr pafajësinë në SPAK, atëherë do vijojë mandatin si Kryetar Bashkie i Himarës. Por kjo është pamundësi absolute, sepse Beleri është kapur në flagrancë, dhe nuk ka gjykatë që t’i japë pafajësi, e jo më SPAK-u. Të shohim më pas se si do të shkojnë zgjedhjet për kryetarin që do të zgjidhet në zgjedhjet e reja, dhe cili do të jetë kandidati i ri që do zgjidhet nga himarjotët. Por SPAK duhet ta gjykojë sa më shpejt me një procedurë të përshpejtuar, se kjo është një çështje me rëndësi të madhe kombëtare”, tha Ngjela.
Sipas Avokatit Ngjela dënimi minimal që mund të jepet për Belerin është 6 muaj burg, pasi ai është i arrestuar në bazë të nenit 328 të Kodit Penal për Korrupsion Aktiv në Zgjedhje.
“Beleri është i arrestuar në bazë të nenit 328 të Kodit Penal për Korrupsion Aktiv në Zgjedhje. Çështja do të gjykohet në SPAK. Minimum që mund të dënohet është 6 muaj burg. Nëse gjykata do ta dënojë Belerin me burg, dhe vendimi gjyqësor do të marrë formën e prerë, Beleri shkarkohet automatikisht në bazë të vendimit me burg që i ka dhënë SPAK”, tha Ngjela.
Po si ka ndikuar arrestimi në rezultatin final për Fredi Belerin? Ja si shprehet për mediat analisti Skënder Minxhozi duke u ndalur tek ajo që ndikoi në diferencën e 19 votave që sipas tij, mund t’i kenë ardhur si favor Belerit, për shkak të arrestimit të tij, që në sytë e qytetarëve ai mund të jetë dukur si viktimë.
“Unë them që 19 votat i ka lëvizur nga vendi arrestimi. Ne kemi thënë, duhet parë, se mos po prodhohet pa dashje një hero në ditën e zgjedhjeve. Viktimizmi është më i fuqishëm se çdo gjë tjetër. Pse mos të ndiqej në gjendje të lirë ky zotëria? Kjo puna e mbetjes në burg është shumë shqiptare dhe është shumë e vjetër”-thotë Minxhozi.
Mediat greke i bënë jehonë fitores së Fredi Belerit në Himarë duke e quajtur një disfatë politike për kryeministrin Edi Rama. Kathimerini, në një analizë të publikuar në faqen e parë, lidhur me çështjen që ka rikthyer përplasjet diplomatike mes Tiranës dhe Athinës. Teksa komenton triumfin pas hekurave të pjesëtarit të minoritetit grek, kandidat i koalicionit “Bashkë fitojmë”, “Kathimerini”thotë se sytë janë kthyer tani nga Tirana, në pritje të reagimit të kryeministrit Rama, që siç shkruan, e kishte kthyer në personale, betejën për Himarën. Sipas medias, Rama do të përdorë sistemin gjyqësor të marrë peng, për të mbajtur kandidatin e arrestuar për blerje votash, jashtë dyerve të bashkisë. Po ashtu “Prothothema”, i dedikon faqen e parë çështjes duke cituar reagimin e Belerit nga burgu se demokracia kishte fituar.
Media publikon gjithashtu videot e brohorimave e festimeve që shpërthyen në Himarë, me shumë prej minoritarëve që kënduan himnin kombëtar grek . Fredi Beleri, kandidati i koalicionit ‘Bashkë Fitojmë’ për Bashkinë e Himarës, është zyrtarisht i arrestuar me urdhër të Prokurorisë së Vlorës me akuzën e ‘korrupsionit aktiv në zgjedhjet’, pra për blerje të voatve. Ai u ndalua nga policia dy ditë para zgjedhjeve të 14 majit, bashkë me 3 të tjerë, ndërkohë që kishte qenë prej ditësh në hetim./Newszone
